News

Mizoram Sawrkar chuan Mizoram chhunga passenger phur chi lirthei chi hrang hrang – four wheeler taxi, two wheeler taxi leh auto rickshaw-a chuang thinte’n sorkar approved rate diktak an chawi theihna atana duan Mizotaxi app chu Aizawl khawpui chhungah hman chhoh mek zel a ni tih tarlangin, “Heng lirthei neitute leh mipuite pawhin tangkai taka an hman beisei a ni.

Mizoram Sawrkar tarlan danin, tunah hian Mizotaxi app hnuaiah lirthei 1549 an inziak lut tawh. Heng lirtheite hian Mizotaxi sticker belin Aizawl khawpui chhungah an service mek a, anni ho hi document pawh clear vek an nih bakah, a khalhtute pawh fel taka register thlap an ni. Mipui tan pawh anni ho hman hi a him em em a ni.

Tun dinhmunah hian Mizotaxi app hnuaia lirthei inziak lute hian mipui mamawh khawp an la phuhruk zo lo deuh. Hetiang anih avang hian Mizotaxi app hnuaia in register lirtheite chu mipui mamawhna phuhru turin online reng tur leh a tam thei ang ber tian turin ngen leh hriattir an ni. Sorkarin tam zawk an tlan theihna atan hma a la mek a, tun atanga rei loteah hian thu thar neih beisei a ni.

Mizotaxi app hnuaia lirthei inziak lut an la tlem deuh avangin trip cancel a tam em em mai, mipuite hriatthiamna an ngen. Sorkarin permit pek belh loa, he Online Cab Booking System hi kalpui a tum hram hram vang a ni tih lo hrethiam turin inngen a ni.

Mizotaxi app hnuaia inziahluh theih hun chu July 31, 2026 khan tihtawp lailawk a ni. Hun tiam chhunga inziak lut ve hman lote an awm. Tin, online kaltlanga dil, hun tiam chhunga in clear hman Io te an awm bawk. Hetiang hi thil awm dan anih avangin Mizotaxi app hnuaia inziahluh hun chhung hi September 30, 2026 thleng pawhsei a ni e.

Hemi hun chhung hian Aizawl khawpui chhunga auto rickshaw, two wheeler taxi, leh four wheeler taxi-te chu in register theih a ni. Registration hi Mizotaxi Office, Transport Complex, Chaltlang-ah emaw Online kaltlangin emaw tih theih a ni a, lirthei document update lo chu register theih a ni lo.