MLA hluiin ngaihdam a dil

Congress Party ticket-a West Tuipui Bial atanga MLA atana thlan tlin thin Nihar Kanti Chakma, Ex. MLA chuan Tlabung chu Chakma-te khaw hlun (homeland) leh 1898-a British rorelna hnuaia rin luh a nih hma chuan Chittagong Hill Tract-a bet anga a sawi avangin ngaihdam a dil.

Nihar Kanti Chakma hian vawiin (19.9.2026) hian Aizawl Press Club-ah press conference koin, a mobile phone-ah Artificial Intelligence (AI) hman tangkai tumin a inzir a, a phone hmanga a thil ziah sual chu thil pawi tak a nih thu a sawi. Tlabung chu Chakma-te khaw hlun ang hian a sawi a, British rorelna hnuaia Mizoram a awm hma phei kha chuan helai hmun hi Chittagong Hill Tract-ah betin Chakma-te luah chin ram niin a tarlang a ni.

Nihar Kanti Chakma chuan Tlabung Welfare, Aizawlte chu September 10, 2026 khan len chilhin press conference kova ngaihdam dil tura an ngenna angin vawiin hian press conference hi a ko ta tih a sawi a, “Heng zawng zawng lo thlen chhan chu keimah vang a ni,” tiin thupha chawina chu Tlabung khawtlang leh welfare-ten an pawm sak theih chuan a lawm hle tur thu a sawi.