MNF-in Martar Day an hmang

MNF chuan vawiin (21.9.2026) hian Mizoram hmun hrang hrangah ‘Martar Day’ vawi 46-na an hmang a, a hmanna pui ber Aizawla MNF Oficie-ah chuan MNF President Zoramthanga hoa hun hman a ni.

Zoramthanga chuan hnam martarte hlutna leh ropuizia sawiin, “Ṭhangthar lokal zelte pawhin ram tana zalenna sualtu Mizo hnam sipaite leh hnam martarte ngaihsan nachang leh hlut nachang an hre zui zel leh an ngaihven thar nasa hi ropui ka tiin lawmawm ka ti tak zet a ni. Hnam sipaite leh he hnam tana martarte inpekna leh hnathawh zawng zawng te, engkim huama an inhlan ralna kha a ropuiin a zahawm em em a ni. Vawiina la damte leh ṭhangthar lokal zel turte pawhin zah tak chunga kan hriat reng leh thudik hre tura kan zirchian a pawimawh hle,” a ti.

Zalenna sualtu Mizo hnam sipaite leh Mizo hnam martarte thisen zara kan ramin thil tam tak a lo hlawhchhuah tawhte a hlut thu sawiin MNF President chuan, “Inremna (Peace Accord) a awm theihna tura kohhran, political party, NGO te, ram mipui leh kan hnam sipaite’n kan mipuite ngenna avanga inremna lo awm ta leh an lo hlawhchhuah kha a hlu em em ni. Heng zawng zawng hi kan thinlungin engtikahmah a theihnghilh ngai lo a, kan ram tana nunna hlantu hnam martar-te thisen hi Mizoram tan a luang thlawn ngai dawn lo,” a ti a, martarte zahna chibai buk nawn leh turin mipuite a sawm.

MNF President chuan sorkar lai mek Chief Minister, an political opponent ṭhenkhatin MNF movement leh Mizoram Peace Accord (Memorandum of Settlement) sawinep leh sawihnawm tum ṭhin mah sela,; Mizo hnam sipaiten kan ram leh hnam tan nunna thapa zalenna an lo sualna te, Mizo hnam martarte thisen man hlutziate a dal phah ngai dawn loh tih sawiin, “Sawinep theih ngawt a ni lo a. inremnaa tel ve lo, a engamah hre tak taklote lo sawinep tum ve ngawt chi pawh a ni hek lo. Harsatna tam tak paltlanga Mizoram Peace Accord-in a hlawhchhuah Article 371(G) te, kan ILP insawhnghehna tiderthawng thei zawnga ZPM Sorkar chet duh dan hi a demawm hle,” a ti.