MNF Legal Board-in FIR an thehluh

MNF Legal Board chuan vawiin (5.10.2026) hian MNF President Zoramthanga thusawi siamchawp thehdarh a nih chungchangah Cyber Crime Police Station-ah FIR an thehlut.

MNF FIR thehluh :

Tunlai hian MNF Party President Pu Zoramthanga, Ex- Chief Minister thusawi ni miah lo, a sawi ni awm tak video siamchawp / tihdanglam (forged / false electronic record) “MNF hi Pathian leh Mipuite zarah kan sawrkar hunah, mipui retheite nuai 5 atanga nuai 15 inkar, kum tin pawisa kan pe dawn a” tih chu Social Media lamah a darh chiam mai a. He video viral-ah hian Caption atan thuziak dahtel a awm bawk a, chungte chu:-

‘MNF mi leh sa mi tlemte hnenah cheng nuaithum aiah vaimim an lo sem tawh a.!’, ‘Tunah nuaih 15 an tiam leh ta, nuaih 15 aiah Chakai a ni leh mai a…’

‘Maurawkela te ho takzet hi chu aw.!’

MNF President hian hetiang thu hi a sawi lo hrim hrim a. MNF Party leh MNF President tihchhiat nan te, mipui rilru thianghlim tak hruai sual nan tea video siamchawp /tihdanglam (false electronic record/document) tih a chiang em em a. Hetianga mi zahawm tak, Mizoram Chief Minister kum rei tak lo nia ram leh hnam hmasawnna hna tam tak lo thawk tawh leh a ngaihtuahna pawh ram leh hnam tana la hmang chhunzawm rengtu thusawi ni miah lo, a sawi anga video lo siamchawp/tihdanglam hi BNS Sec. 336 (4) bawhchhiatna lian tak a ni.

He vedio siamchawp thehdarhtute chu:

1.Pu B. Lalchhanzova, Chairman, Media & Publicity Department, ZPM Party chuan he video thehdarhtu hi amah ngei a nih thu a sawi a, khawi atanga a dawn nge tih leh tunge a siamtu tih zawn chhuah hi amah pawhin a tul a tih thu a sawi chhuak a.

2.Facebook user name Lalbuaia Vanchhawng chuan MNF Party President thusawi loh pui sawi anga lantirna video hi facebook-ah a post bawk a, a hnuaiah hian link ka rawn dah bawk e.

Facebook user name Marini Zpm (Lalrinmawii D/o Lalzawnchhuaha (L) R/o Khawzawl Vengthar) chuan facebook group pakhat ‘LAWRKHAWM’ tihah 25.9.2026 khan MNF Party President thusawi loh pui sawi anga lantirna video hi a post bawk a, whatsapp group hrang hrangah a theh darh bawk.

Hengte bakah hian he video dik lo (false/forged electronic record/document) hi social media platform hrang hrang, Facebook, WhatsApp, YouTube, Instagram etc. ah te thehdarh a ni bawk.

Hetianga ram hruaitu lo ni tawh leh mi zahawm tak thusawi lohpui sawi anga electronic record/document lem (false/forged electronic record/document) lo siam hi dawt hmanga MNF President Pu Zoramthanga, Ex- Chief Minister nasa taka tih hminghliauva tihchhiat vek tumna leh MNF party tihchhiat vek nana mipui bum tumna ngialngan tak a nih avangin dan bawhchhiatna lian tak a ni a. BNSS Sec.173 hnuaiah FIR register a, a siamtu leh thehdarhtute hi min zawn chhuahsaka dan anga hrem an nih ngei theihna tura hma min lak sak turin MNF Legal Board in kan ngen a che.

Note : An thusawi leh an post darh tih finfiahna hmuh theihna link-te pawh an ziak tel.