News

MPCC chuan vawiin (26.8.2026) hian an office-ah political session an hmang a, thusawitu MPCC President Lal Thanzara chuan MPCC chu an siamthat thu sawiin, MNF hotupa chu BJP note an nihzia sawiah puhin, CMO-ah adviser-te aiin pension rawih nawn leh pakhat a thu zawk niin a sawi.

Lal Thanzara chuan an hotuten MPCC a mawhphurhna neitute tunhnaiah siam tharin, an insiamṭha tih sawiin, “Hei hian Zoram puma Congress Party mipuite a tilawmin kan phur phah hle niin ka hria a, lawmawm ka ti hle. Pathian thuin ‘Hnunglama thilawm te chu theihnghilha, hmalama thilawm te chu banin’ a tih ang khan inlungrual takin, kum 2028 inthlanpui lo awm tur atan theihtawp i chhuahho ang u, tiin ka sawm che u a ni,” a ti.

An elpui party-te chu BJP hlau em em an nih thu sawiin MPCC President chuan, “Inthlan laia BJP sum tam tak lo hmang tawh tute niin BJP tih lawmloh hlau reng rengin an kal mek a ni. Kan opposition pui MNF-te hi an hotupain BJP note an nihzia leh a bultumtu an nihzia chu hmanni lawkah pawh a sawi chungchang chanchinbu-ah kan hmuh kha,” tiin BJP peng leh BJP hlau reng rengte’n kan ram tan malsawmna an thlen a rin loh thu a sawi.

MPCC President chuan BJP-te chu India atanga Kristiante nuaibo tum tute, India danpuia secular nuai bo a, chanchin tha hriltute tiduhdahtute an nih thu sawiin, “Hindu lal rama India siam tumtu te, zirlai pawisawi lo nghaisa tute, India mihausa tawntaw te vulh ngar ngara mipui vantlang chan aia vulhtu an ni. FCRA hmanga kohhran leh hnam hnufualte hamthatna tihdanglam tumtute an ni,” a ti.

ZPM chhungah intentawnna ni lovin, inteitetna a thleng mek nia a lan thu sawiin Lal Thanzara chuan, “CMO-ah Adviser-te aiin pension rawih nawn leh pakhat chu a thu zawk avangin an pheikhai a rual thei lo niin an sawi. An term an hman zawh hram hi i duhsakpui ila. Sawhthing man an ba te hi pe zo phawt se, bana kaihte hi thalai tam takin chhawr phawt se chumi hma chuan la inpumkhat hram hram se a duhawm a ni,” tiin a sawi chhunzawm.