News

MZP Assembly Darlawna neih mekah nimin (24.9.2026) khan ro an rel a, agenda 11 passed-in, chung zinga paruk chu zirna kaihhnawih niin, a dang panga chu ram leh hnam kaihhnawih a ni.

Nimin vek vantlang inkhawmah MZP President Dr. C Lalremruata chuan MZP hre chiang lo leh an pisa-ah pawh vawi khat pawh la lut lo, MZP Dan Bu pawh la chhiar lo leh MZP-in ram leh hnam tana a thawhte hre duh miah loten nasa takin an sawisel thin tih sawiin, “He pawl hi ding tlak lo hialah chhuahin thiah a tul thute an sawi fo thin a ni. MZP chuan pawl hmalakna tur reng reng hi ngun taka ngaihtuahin, committee-in a rel thin. MZP hian huang lo kan nei lo a, kan pawl thil tum ang zela kalin committee-in ram leh hnam, zirlaite tana tha tur ni a a ngaihah chuan hma kan la mai thin,” a ti.

MZP President chuan MZP chu kum 1935 a din tawh niin, rambuai avangin pawl pawhin a tuar a, a chak lo chho hle tih sawiin, “Kum 1993 ah dinthar leh niin,tunah hian MZP hi kum 90 lai kan lo tling ve ta a ni. Zirlai pawla inhmang te hi mi fing bik, mi fel bik kan nih loh avangin han chet fuh loh changte pawhkan nei tawh thin ngei ang. Amaherawhchu, ram leh hnamin chhan a ngaih apiangin mipuiten khawnge MZP a awm an ti a, mipuiin min auh hmain kan lo che chhuak fo tawh thin,” tiin an lo che har deuh a nih pawhin mipui te beiseina hriain he pawl hia che chhuak fo thin thu a sawi.

MZP thu pass-te :

Zirna kaihhnawih:
1)Mizoram sawrkar enkawl college hrang hrangten an mamawh Bus an neih theih nan sawrkarin hma la rawh se.
2)CUET, NEET leh All India Competitive Exam-ah Mizo zirlaite’n exam centre chungchângah harsatna an tawh thin avângin, Mizoram-ah CBT Exam Centre dah belh a nih theih nan hmalak ni rawh se.
3)Zofate kan inpumkhat leh zual theih nan, sikul zirlaibu-ah Mizo
hnam hrang hrangte chanchin telh a nih theih nan, MZP in hma la rawh se.
4)Mizo thalai leh zirlaite tan Career Awareness Campaign leh Nationalism Campaign a tam thei ang ber MZP-in buatsaih rawh se.
5)Zirlaibu-ah Mizo tawng dik tak hman anih theih nan, a tul angin hmalak ni rawh se.
6)Zirlaiten ruihhlo hman sual a hlauhawmzia an hriat theih nan MZP in nasa zawkin Drugs Awareness Campaign buatsaih rawh se.

Ram leh hnam kaihhnawih:

7)Kaladan Multi-Modal Transit Transport Project (KMTTP)-in kan ram leh hnam tana nghawng a neih theih dan zirchiana, hmalak ni rawh se.
8)Mizoram ramri dik tak humhalh a nih theih nan sawrkarin hma la
rawh se.
9)”The Mizo Marriage and Inheritance of Property (Amendment) Act, 2026″ khauh taka ken kawh a, hnamdang thlah ten Scheduled Tribe (ST) chanvo an chuh ve loh nan hmalak ni rawh se.
10)Mizoram luhka hmun hrang hrangah mi tupawh ILP check an nih theih nan, MZP in hma la rawh se.
11)Mizo hming hawha hnamdang sumdawn tirte na taka hremna dan sawrkarin siam se, a tul anga dap chhuah thin ni rawh se.