News

Mizo Zirlai Pawl (MZP) General Headquarters executive meeting vawiin (26.8.2026) a neih chuan Mizo hnam dan, The Mizo Marriage & Inheritance of Property Act, 2026 Supreme Court hial a khing duhtu Mizo nu ni thin, hnamdang pasal nei ta chu MZP chuan an dem takzet tih an tarlang a, MZP rorelna sang ber dawttu Federal Council agenda tur an thlifim.

MZP thuchhuah tarlan danin, meeting chuan tun hnaia Mizo hnam dan, The Mizo Marriage & Inheritance of Property Act, 2026 Supreme Court hial a khing duhtu Mizo nu ni thin, hnamdang pasal nei ta chu a dem takzet tih tarlangin, “Kum 2015 atang khan MZP chuan hnamdang nupui pasal nei lo tura inzirtirna alo hmang tawh thin a, Kum 2023 MLA election dawnah pawh political party tinte hnamdang pasal nei ticket pe lo turin a lo ngen tawh,” an ti.

Tuna Supreme Court-a khingtu hi political party pakhatin MZP-te ngenna zah loin ticket an pek luih avangin Aizawl khawchhungah kawngzawh pawh MZP hian a lo buatsaih tawh tih tarlangin MZP chuan, “Hnamdang pasal neite chungchangah hian MZP chu a ngaihdan a la ngai reng,” tiin political party hrang hrangte pawh heng mite hi eng inthlanah pawh theh chhuak lo turin an ngen nawn leh thu an tarlang.

MZP rorelna sang ber dawttu Federal Council vawi 61-na August 31, 2026(Thawhtanni) a neih tur Agenda thlitfim nghal a ni a, chungte chu :

1.Zirlaiten ruihhlo hman sual a hlauhawmzia an hriat theih nan MZP-in nasa zawkin Drugs Awareness Campaign buatsaih rawh se.

2.Mizoram ramri dik tak humhalh a nih theih nan sorkarin hma la rawh se.

3.Mizoram sawrkar enkawl college hrang hrangten a an mamawh Bus an neih theih nan sawrkarin hma la rawh se.

4.Kaladan Multi-Modal Transit Transport Project (KMTTP) -in kan ram leh hnam tana nghawng a neih theih dan zirchiana, hmalak ni rawh se.

5.Mizo thalai leh zirlaite tan Career Awareness Campaign leh Nationalism Campaign a tam thei ang ber MZP in buatsaih rawh se.

6.“The Mizo Marriage and Inheritance of Property (Amendment) Act, 2026″ khauh taka kengkawh a, hnamdang thlah ten Scheduled Tribe (ST) chanvo an chuh ve loh nan hmalak ni rawh se.

7.CUET, NEET leh All India Competitive Exam-ah Mizo zirlaite’n Exam centre chungchângah harsatna an tawh thin avângin, Mizoram-ah CBT Exam Centre dah belh a nih theihna turin hmalak ni rawh se.

8.Mizoram luhka hmun hrang hrangah mi tupawh ILP check an nih theih nan, MZP in hma la rawh se.

9.Zofate kan inpumkhat leh zual theih nan, Sikul zirlaibu-ah mizo hnam hrang hrangte chanchin telh a nih theih nan, MZP in hma la rawh se.

10.Zirlaibu-ah Mizo tawng dik tak hman anih theih nan, a tul angin hmalak ni rawh se.

11.Mizo hming hawha hnamdang sumdawn tirte na taka hremna dan Sawrkarin siam se, a ṭul anga dam chhuah ṭhin ni rawh se.