News

Home Minister K Sapdanga chuan vawiin (24.9.2026) khan MZP inkhawmpui Darkhawpui Run, Darlawna neih chu a hmanpui a, hnam vei danah huang zauh a hun thu a sawi.

Delhi-a a kal changin Delhi-a Mizo zirlai hruaitute nen an inkawm fo tih sawiin K Sapdanga chuan, “Tun hnaiah hian Delhi-a kan Mizo officer-te ka kawm thin. Central Secretariat-ah te, corporation office hrang hrangahte Mizo hnahthlak an tlem hle a, a awmchhunte pawh Mizoram state pawn lama cheng kan unaute an ni deuh vek. Damdawi-in lian pui puia tam hle a, Mizo tlangval doctor hmuh tur an awm meuh lo a, Mizo nula nurse tawn fuh tur an awm zeuh zeuh,” a ti.

Home Minister chuan kan state kan pachhia a, hmasawnna atana kan mamawh sum 90% aia tam mah sorkar laipui, Central secretariat atanga min rawn pek a nih thu sawiin, “Tax devolution avanga kan hmuhte chu a beitham hle, a chhan chu kan state-in central-a tax kan zu chhun luh hi a beitham em a ni,” a ti a, kan mamawh tam zawk daih hi chu a dila kan dil chhuah a nih thu a sawi.

K Sapdanga chuan state dangte pawh central suma innghat chu an ni ve tho tih sawiin, “Mah se Central secretariat-ah khuan state dangte hi chu an mi leh saten hmun pawimawh tak tak an luah fur a, hmelhriat nei leh nei lo kar a hla fo thin. Officer tlemte kan neihte awmna office chu a dan a dang khawp mai, mahse kan tlem lulai em a ni. UPSC hnuaiah Civil Service kan zuam lo a nih pawhin Staff Selection Commission hnuaiah central ministry hnuaia thawh tur hna tha tak tak tam tak exam tur a awm reng,” a ti.

Kan ram rethei nuam kan ti mah mah thu sawiin K Sapdanga chuan, “Kan khawtlang nun, social life hi a nuam a, thawhchhuah nei lem lo pawh hian kan lungawi em em a, kan comfort zone atanga tal chhuah hi kan hreh a, state dang hmasawn zawkte awh nachang pawh kan hre lo. Tuna kan inchhep chhoh danin a hril chiang tak chu, tun atanga hun rei vak lovah hi chuan sorkar department tam zawka hotu lu ber chu state pawn lam mi an ni dawn,” tiin chief secretary tur kan neih hnaivai loh thu a sawi.

Home Minister chuan tualchhung hna pawh el fe tham a nih thu sawiin, “Home department-in home guard 94 a la thar dawn a, HSLC passed chin chung lam mi 6,200 vel diltu an awm. An zinga 6,100 vel chu an tling zo dawn lo. Graduate hlir pawh la dawn ila, an daih zan. Nikuma police constable 295 lak zinga 50 zet chu graduate an ni a, master degree nei kha 20 vel an awm. Chutih laiin pawl 10 pass tawk tawk, tih tak taka beitu tling an tam em em a ni,” a ti.

India ram state thenkhatah MZP ang chi zirlai pawl hi an awm ve thluah tih sawiin K Sapdanga chuan, “University lianahte hian zirlai pawl lian tak tak, active tak tak an awm. A tlangpuiin political party sponsored zirlai pawl an ni hlawm. Chu chu MZP nen kan inan lohna a ni. A hmingin zirlai pawl an ni a, mahse MZP nen chuan an tobul leh an tinzawn a hrang daih tih hriat a tha. Tha nia kan hriatah chuan sorkar hnenah huaisen takin thurawn kan pe thin tur a ni,” tiin MZP-te a chah.

Home Minister chuan MZP chu leadership training-na atan pawl remchang tak a nih thu sawiin, “Non political social organisation zinga hnam humhalh tina pawl ber kan ni hial ang. Chuvangin, kan hruaitu hluite hi political party-te hian an pawl zawm tura thlemah tak an neih ve bawk thin. A mawi lo zawnga lo sawi duh pawl an awm pawhin thil mak a ni lem lo,” a ti a, thenkhat chu an duh reng vang ni loin, thlemna a nasat em avangin chak lo chungin politics khawvelah an zuang luh thu a sawi.