Ngaihdam dilna ti chhuak

Kawnpui-I Village Council leh Kawnpui Hmarveng All NGO chuan Zakaria Lalhriattluanga (29) s/o VL Duailova, New Builum thih chungchangah thupha chawina leh ngaihdam dilna an ti chhuak.

Kawnpui-I VC leh All NGO chuan an khawtlang thalai zinga mi tute emaw chetna avanga Zakaria Lalhriattluanga’n nunna hial a chan pawi an tih thu tarlangin, “Lusun chhungte kan tawrhpui tak zet a ni. Vawiin, 21.09.2026 zing kara Kawnpui VC-I leh Kawnpui Hmarveng chhunga NGO hrang hrang hruaitute joint meeting chuan kan police chak tak ten misualte hi rang taka an chhui chhuah vat kan beisei. Khawtlang mipuiten theih tawp chhuaha pawi khawihtu an chhuina kawngah tanpui ni se kan ti,” an ti.

Zakaria Lalhriattluanga kut thlaktu dik tak hriat chhuah a nih hunah pawh dan hmanga an phu tawk hremna pek ngei an duh tih tarlangin Kawnpui-I VC leh All NGO chuan, “New Builum khawtlang mipui leh lusun chhungte lakah thupha kan chawi a ni,” a ti a, New Builum khaw mi chauh ni lo, Mizoram chhung leh pawna he thihna lo hretu zawng zawngte hnenah pawh an khawtlang chuan ngaihdam an dil tih an tarlang.