No Vehicle Zone siam a dawn

Vawiin khan Lunglei Municipal Council (LMC) Board of Councillors (BoC) chu an Chairman Lalzuithanga kaihhruaiin Lunglei Convention Centre-a BoC Meeting Hall-ah an ṭhu khawm.

LMC BoC ṭhutkhawmah hian Krismas 2026 atana inbuatsaihna ṭul hrang hrang sawi ho a ni. Krismas 2026 lawmna chi khat atan kawtthler/veng/kawn chei intihsiak buatsaih ṭha tih a ni a, pakhatna lawmmanah ₹3,00,000, pahnihna lawmmanah ₹2,00,000 leh pathumna lawmmanah ₹1,00,000 ruahman a ni. he’ng bakah hian a ti ṭha veng pathum tan consolation prize ₹30,000/- ṭheuh pek ni se, an ti.

Krismas Bazar siam ṭha tih a ni a, a ṭul anga hma laa bawhzui turin Krismas Bazar Task Force Committee din niin, Chairman atan LMC Chairman leh Secretary-ah LMC Chief Executive Officer (CEO) te ruat an ni.

Krismas Bazar hun laiin lirthei luh theih lohna chin, No Vehicle Zone siam ṭha tih niin, LMC hnuaia Traffic and Transport Coordination Committee (TTCC) chu ruahmanna kimchang lo siam tura tih an ni. No Vehicle Zone huam chhunga intihhlimna buatsaih leh thil ṭul dangte chu Krismas Bazar Task Force Committee-in ruahmanna a siam thung ang.