Petrol pump khar tum thulh

All Mizoram Petroleum Dealers Association (AMPEDA) chuan thuchhuah siamin, vawiin (16.9.2026) chhun dar 1 khan Home Secretary Vanlalmawia hoin a pisaah MZP hruaitute nen an harsatna tawhte an sawiho tih an tarlang.

AMPEDA chuan, “Harsatna kan tawh mek dante leh hun lo la awm tura a pumpelh dan turte kan sawiho hnuah mipui (customer) te tan a harsatna a thlen loh nan AMPEDA chuan September 17, 2026 (Ningani) atang a Mizoram puma petrol pump khar kan tum chu kan thulh (call-off) ta a ni,” an ti.

Tarlan tawh angin, AMPEDA chuan an member hnathawh (hnamdang) chu MZP-te’n an pisaah hrengin, tihluihna hmang cheng nuai 2 bank account pakhata an thun tir thu leh pump thenkhat cheng nuai 1.2 account ngai thoah hian transfer tura an tih thu tarlangin, “Pawisa an lak sak tawh hi September 17, 2026 hmaa an pekir lo leh tuna pawisa pe tura an tihte an hnukkir lo a nih chuan Mizorama petrol pump zawng zawngte September 17, 2026 atangin tiamchin awm loin khar a ni ang,” an ti.

Hetihlai hian MZP chuan tihluihna tel lo leh kutthlakna tel loin, MZP-in September 23, 2026 a Dawrlawna Assembly an neih tur atan LT Brothers Filling Station, Keifang chuan sum an thawhthu an tarlang thung.