Pluck and Pay Festival

Vawiin (23.9.2026) hian Mizorama a vawikhatna atana Tourism Department leh Khawzawl DC Office tangkawp buatsaih ni thum awh tur Pluck and Pay Festival (Lo la Lei Rawh) chu Vanhnuailiana Hall, Tualte-ah Tourism Minister Lalnghinglova Hmar chuan a hawng.

Lalnghinglova Hmar chuan, “Kan ram mawina te, kan boruak thianghlim te, kan thing leh maute hi khualzin hiptu a ni. Heng kan ram mawina leh hausakna phochhuak tura Pluck and Pay Festival buatsaih a ni hi lawmawm. Hman khat daih plastic tel loa he festival hman tum a ni hi a fawkawm hle, festival dang la awm turah pawh plastic tel lova green festival hmang turin hma lak tum a ni,” tiin festival buatsaih kawnga department hrang hrangte karah thawhhona convergence tha tak a awm chu lawmawm a tih thu a sawi.

Tourism Minister chuan festival-ah hian Mizoram pawna mi khualzin lo kal se an tih rualin, Mizoram chhunga chengte hian kan rama hmun mawi leh pawimawh te kan ngaihsana kan ngaihhlut hmasak a ngai tih sawiin, “Kan ram chhunga chengte hi kan intlawhpawha, kan ram mawina thehdarhtu ambassador kan ni theuh thei,” tiin Chawngtlai leh Tualte mipuite inpekna leh thawhrimna avangin lawmthu sawiin, festival hlawhtling tak nei turin duhsakna a hlan a ni.

Pluck and Pay Festival hi September 23 – 25, 2026 chhung Chawngtlai leh Tualte khuaah neih tur a ni. Festival chhimtu mipuiten a thlengtu khuaa loneitute huanah kalin thei leh thlai rah chi hrang hrang loin, an lei thei dawn. Chawngtlai field-ah kut hnathawktute thar chhuah leh siam chhuah zawrhna stall eng emaw zat a awm a, Zawlkhaw Adventure Club-ten zipline hmanga uai theihna an buatsaih bawk. Chawngtlai Historical Society leh Tualte Vanglai Committee-te kaihhruaiin historical leh tourist site hrang hrang, Pathian tlang te, Nikuala Lungdawh te, Zo Hill Station te, pasalthate in hmun te leh hmun pawimawh dangte a tlawh theih. Heng bakah hian mipuite intihhlimna tur Mizo infiamna hrang hrang buatsaih a ni a, zaithiam lar tak takte hoin tlaiah concert buatsaih a ni bawk.

Tualte khuaah hian kum 2019 atang khan Horticulture Department-in tomato ching turin hma a la tan a, chhungkaw 200 chuangin eizawnna atan hmangin, tun thleng hian quintal nuai 10 chuang an thar tawh bakah cheng nuai 1400 chuang zet an lalut tawh. Tualte khuaah vek hian kum 2025-2026 chhungin MIDH Scheme hnuaiah chhungkua 151-te chu sapthei ching tura thlan niin, hma lak chhoh mek a ni.

Chawngtlai khuaah hian kum 1995 vel daih atang tawh khan chhungkaw 10-in sapthei an lo ching tan tawh a ni. A karah harsatna tawk mahse tan la thar lehin, a chingtu an pung zel a, sapthei chinna atana an mamawh tur bungrua (material component) hrang hrang pek an ni . Chawngtlai khuaah vek hian kum 2020 vel atang khan mumal taka tomato chin tan niin, tunah chuan chhungkaw 120 chuang zetin eizawnnan an hmang mek. Tun thleng hian tomato quintal 8000 chuang hralh tawhin cheng nuai 400 chuang zet an lalut tawh a ni.