News

Nimin (25.9.2026) khan Mizorama a vawi khatna atana buatsaih ni thum awh Pluck and Pay (Lo la, lei rawh) Festival kharna hun chu Nikuala Mual, Chawngtlai-ah neih a ni a, MLA Baryl Vanneihsangi’n khuallian niin hun a hmanpui. A hawnna hun chu September 23, 2026 khan Tualteah Tourism Minister hoa hman a ni.

Baryl Vanneihsangi chuan thu sawiin, “He festival hlawhtling taka buatsaih a nih theihna tura sawrkar hotute thahnemngaihna leh Khawzawl DC Office leh Chawngtlai leh Tualte Village Council hotute tanrualna chu fakawm a tih thu a sawi a. Kan Mizona leh kan hnam nunphung kalsan loin hma a sawn theihin a changkan theih. Kan ram leilunga thei leh thlai kan tharte hi kan ngaihlu tur a ni,” tiin Khawzawl District chhunga khaw hrang hrangte chu hmasawnna kawnga a tha zawnga inel turin a fuih a, festival buatsaih leh a nih chuan hei aia tam lawh tur thar turin leh hei aia tam chhimtu kalkhawm turin duhsakna a hlan a ni.

He Pluck and Pay Festival kharna hunah hian kalkhawmten environment humhalh turin intiamna an sawi ho a, Chawngtlai Village Council President Sanghlunkima’n lawmthu sawiin hun a khar a, concert neih zui a ni.

Pluck and Pay Festival chhung hian Mizoram State Rural Livelihoods Mission (MzSRLM), Khawzawl RD Block leh NABARD te tangho-in Chawngtlai-a Block Mela an buatsaiha SHG stall 15-te chuan Rs. 6,43,600 an hlawh chhuak a, stall dangten Rs. 5,32,800 hlawh chhuak vein, a vaia belhkawmin Chawngtlai Nikuala Muala stall zawng zawngten ni thum chhung hian Rs. 11,76,400 an hlawh chhuak a ni. Tualte Field-a stall 12-ten Rs. 2,08,500 an hmu chhuak a, huan atangin Rs. 21,000 man hu thei leh thlai an hralh.