Police an duty ngawrh

Aizawl khawpui chhunga dan leh thupek kenkawhna leh mipuite himna atan Superintendent of Police, Aizawl District ruahmanna angin Intensive Patrolling leh Naka Checking ngawrh taka neih a ni.

He hmalakna atan hian Aizawl khawpui tuam chhuakin Police Station 4 — Aizawl PS, Bawngkawn PS, Kulikawn PS leh Vaivakawn PS-te aṭangin hmun pawimawh hrang hrangah, Foot & Mobile Patrolling duty point 8 leh Naka Checking point 6 (a vaiin duty point 14)-ah Police mi leh sa 75 te dah (deploy) an ni.

Heng bakah hian Police lirthei (vehicle) hmangin khawpui hmun hrang hrangah Mobile Patrolling neih niin, Aizawl khawpui chhuahka hmun thum thlan bikah Police Uifing (Canine Squad)-te nen, Naka Checking hi ngawrh taka neih a ni.
He Intensive Patrolling leh Naka Checking hi mipui himna atan te, ruihhlo leh dan bawhchhiatna hrang hrang venna atante leh lirthei enfiah (check) nan ruahman a ni.

He Intensive Patrolling leh Naka Checking neih chhung hian dan bawhchhia mi engemaw zat chu man an ni a, PR Bond siamsak an ni. Tin Naka Checking Point-ah foreign cigarette Oris 3599 cartons man a ni a, Legal Metrology Department-ah dan hmanga hlan a ni.

Aizawl District Police chuan Aizawl khawpui chengte chu hemi kawnga Police-te hmalakna ṭawiawma, dan zawm ṭheuh tur leh thil rinhlelhawm emaw dan bawhchhiatna emaw an hmuh leh hriat chuan rang taka Police-te hnena hriattir zel turin an ngen a ni.