Ropuiliani Tribal Freedom Fighters Museum hawng

Prime Minister Narendra Modi chuan vawiin (November 15, 2026) hian Ministry of Tribal Affairs hnuaia hmalakna-a din Ropuiliani Tribal Freedom Fighters Museum, Kelsih chu biak hmuh theihna kaltlangin a hawng. Hemi rual hian Eklavya Model Residential School (EMRS), Zawlnuam a hawn bakah Ekalavya Model Residential School (EMRS), Pangzawl South sakna tur lungphum a phum nghal. A hmunah Chief Minister Lalduhoma’n Ropuiliani lim a hawng thung.

Prime Minister chuan Janjatiya Gaurav Diwas puala India ram mipuite chibai bukin, zalenna sualtu tribal-te zahna chibai a buk a, “He ni hi tribal-te hnam ziarang leh nunphung hausa tak bakah ram tana an tha thawh chawimawina a ni. Sawrkar Laipuiin hmasawnna huapzo a ngaih pawimawh,” tiin World Bank report-in tunhnai kum 12-13 kalta chhunga reitheihna ata mi vaibelchhe 50 vel khai chhuah an nih thu a tarlan leh, Naxalism leh Maoist hel awm lohnaa India siam a ni ta chu lawmawm a tih thu a sawi.

Ram leh hnam chhan nan tribal-te’n theihtawp an chhuah thu sawiin Narendra Modi chuan, “Tribal mi huaisente chu vawiin ni thlenga mite ngaihsan leh midangte phurna petu an la ni reng. November 15, 2021 atanga an puala hun hman thin Janjatiya Gaurav Diwas pawh ropui taka lawm a ni a, tunah chuan India ram huap kût a ni tawh. India ram hmasawn nan tribal-te’n phur taka tha an thawh hi a lawmawm hle,” a ti.

Chief Minister Lalduhoma pawhin thu sawiin, “British ho awpbeh tumna duh loa beilettu lal leh mi huaisen tak tak Mizote’n kan neih nual. Ram leh hnam chhan nana nunna chante zinga mi Lalnu Ropuiliani inpekna a chhuanawm hle,” tiin Mizote chu ram leh hnam chhan nana zam ngai lo, tlawm duh loa a tawp thlenga tang tlat thin kan ni tih hre thar leh theuh tura kalkhawmte chu a chah

November 15 hi India ramin zalenna a hmuh theih nana tribal hruaitu hriat hlawh tak, British dodala Ulgulan Movement kaihruaitu Dharti Aaba Bhagwan Birsa Munda pianchampha vawi 151-na a ni. Hemi pual hian India ram pumah ‘Janjatiya Gaurav Diwas -Tribal Pride Day’ lawm a ni a,Prime Minister chuan Gadchiroli, Maharashtra-a hun hman biak hmuh theihna kaltlangin a hman pui a, hei hi Mizoram atang pawhin chhim a ni.

Vawiina hawn tak Ropuiliani Tribal Freedom Fighters Museum huam chhungah hian Museum, Open Air Theatre, Traditional Hut, Heritage Walk, Birsa Munda Tribal Pride Garden, Cafeteria, Staff quarters leh adangte a awm. Hengte hi Chief Minister chuan fang kualin hmalak dante a enfiah a ni.