Aug 19, 2026
Wednesday
Vawiin (19.8.2026) chhun khan District Treasury Office, Lunglei huaihawtin Lunglei Convention Centre Hall-ah Mizoram Sawrkar hnuaia dan dik loa family pension late’n mahni duh thua pension an tihtawp theihna tura Mizoram Sawrkarin ngaihhnathiamna hun a hawn mek chungchang inhrilhfiahna, “District Level Sensitisation Programme on Voluntary Surrender of Pension Payment Orders (PPOs)” buatsaih a ni a, Lunglei High Powered Committee (HPC) Vice Chairman V. Malsawmtluanga, (Lunglei North MLA) chuan khuallian niin a hmanpui.
He huna tarlan a nih danin, tun dinhmunah Lunglei District Treasury Office hnuaiah pensioner 4,228 awm mekin, thla khata hlawh an lak zat belh khawm chu cheng nuai 1,340 chuang a ni. Family pension la mi 1,815 awmin, family pension-a thla khata pek chhuah zat chu cheng nuai 442 chuang a ni.
July ni 1, 2026-a PPO surrender-na hun hawn aṭangin tun thlengin chhan hrang hrang pali avangin family pension surrender mi pariat awm tawhin, he’ng mi pariatte’n thla khata hlawh an lak belhkhawm chu ₹1,47,674 a ni.
Mizoram Sawrkar chuan danin a phal loh leh document dik lo hmanga family pension late tan July 1, 2026 aṭanga September 30, 2026 chhungin mahni duh thu ngeia pek kir theihna hun a hawng. Hemi hun chhunga surrender lote chu an chungah dan angin hma lak a ni ang
