Blog

Mizoram University (MZU) a Zoology Department head nilai mek Prof. H.T. Lalremsanga leh a research scholar Dr. Ht. Decemson,-te chuan MV Lomonosov Moscow State University a Russian scientists leh Germany-a Max Planck University a an thawhpuite nen Himalayan tlangdung a hmun pakhat Chopta, Uttarakhand atangin ram laitel (skink) chi thar an hmu chhuak.

Prof. H.T. Lalremsanga leh a thawhpuite hian Chopta-a ram laitel DNA leh pianphungte Developmental Biology & Herpetology Laboratory, Zoology Dept., MZU-a an zirchianna atangin ram laitel species thar hmuchhuakin a hmingah Ablepharus Flammeus tiin an vuah. Hemi chungchang hi German scientific journal Salamandra chuan October 30, 2025 khan a rawn tichhuak (published) ta a ni.

He an laitel species thar hmuhchhuah chungchangah hian Prof.H.T. Lalremsanga chuan “Ablepharus-te hi laitel chikhat niin, an mit hi rul mit anga mit vun nei lo leh mitkhap ve thei lo an nih avangin Snake-eyed skinks ti a hriatlar an ni. Khawvel pum huapah hian Europe chhimchhak atang a Asia chhaklamahte chauh awmin, species 19 hmuhchhuah tawh niin India ramah chuan tun a hmuhchhuahthar nen hian species 7 hriat an ni tawh a ni,’ a ti.

Tuna kn hmuhchhuah thar hi tlang sang leh chhengchhe tak tak 2500 m atang a 3300 m chunglam ramhnuai atangtein a nih thu sawiin, ‘ Heng laitel hi a paah chuan an nghawng leh dul vel rawng hian meialh sen rawng a an êm avangin a scientific name-ah Ablepharus Flammeus English name ah Fire-Bellied Ground Skink a Mizo hmingah Laiteldulsen tiin kan vuah,’ tiin he laitel species thar hmuhchhuah hi an biology hriat mumal ala awm lo a, IUCN criteria hnuaiah Data Deficient (DD) a dah a nih thu a sawi.