News

Mi kut tuara September 20, 2026 zana thi Zakaria Lalhriattluanga (29), New Builum pa VL Duailova chuan a fapa thihnaah rorelna dik a phut. Zakaria Lalhriattluanga hi Assam Regiment tanglai niin, chawlh hmang tura a rawn haw Bualpui daiah mi kut tuarin a thi a ni.

Home Minister K Sapdanga hoin MLA pahnih TBC Lalvenchhunga leh Lt. Col. Clement Lalhmingthangate’n nimin (26.9.2026) a an chenna ina an ral tumin VL Duailova chuan Home Minister leh a tawiawmtute an chenna ina an kal chu an lawm thu sawiin, “Ka fapa bungrua leh thawmhnaw rawn thleng tur chu ka huphurh hle. Ka fapa hi kan chhungkaw innghahna ber a ni a, kan in sak lai pawh la zo loin min kal san a ni. A nau chu inhlawhfain ei a zawng me a ni. Ni 6 chhunga case chhuichhuah a lawmawm ka ti hle,” tiin a fapa thihnaah hian rorelna dik tak an phut thu a sawi.

Sorkar thuchhuah tarlan danin, Zakaria Lalhriatluanga hetianga mi kut tuara a boral hi Mizoram Sorkar chuan pawi a ti in a ngai thutak hle. Mizoram Police-te chuan he thil thleng chungchangah hian rang taka hma la zui nghalin a thattu nia puh mi 8 te chu ni 20.9.2026 khan man nghal an ni. Kawnpui Police Station ah tualthah thubuai Bharatiya Nyaya Sahita section 103(1)/115(2)/3(5) Case No.20/26 dt.21.09.2026 ziah luh nghal a ni.

Zakaria Lalhriattluanga thattu nia puh mi 8 zinga puitling 6 te chu ni 21.09.2026 khan Kolasib Disrict Prison & Correctional Home ah dah luh nghal an ni a, kum tling lo mi 2 te pawh Observation Home, Thingdawl-ah dah luh nghal an ni. Heng mite bakah hian thilsual titu a puh midang pakhat chu ni 23.9.2026 khan man belh lehin, hemi ni vek hian Prison & Correctional Home, Kolasib ah dah luh leh nghal a ni.