Ruihhlo ngaite councelling class pe

Nizan (8.10.2026) khan Mizoram Police leh Excise & Narcotics Department-te puihnain, Central YMA leh Central KTP tangkawp chuan Aizawl khawlaia ruihhlo ngai tei vak mai maite chu Central YMA Hall, Tuikhuahtlang-ah hruaikhawmin councelling an pe a, thingpui leh sawhchiar an buatsaih sak.

He hun hmannaah hian hunserh tawi hman niin CYMA Vice President Prof. Lalnuntluanga chuan a kaihhruai a, CKTP Asst. Leader Nicholas Lalbiakzuala chuan Pathian hnena inhlanna leh tawngtaina hun a hmang a, CYMA President R Lalngheta chuan fuihna thu a sawi. Hunserh zawh hian CYMA Fin Secretary MS Ralte, CADS Convener kaihhruainain CKTP-ten councelling class an nei chhunzawm a ni.

He hmalaknaah hian zingkar aṭangin Excise & Narcotics Department thawktute chuan Vanapa Hall leh a chhehvel huamchhunga ruihhlo ngaite an khawm a; zantir atangin Central YMA hnuaia Central Anti Drugs Squad (CADS) leh Zone Anti Drugs Squad (ZADS) zone hrang hrang 11 te atang pawhin an area huamchhung theuh atangin an rawn hruai khawm bawk. Mi 136 hruaikhawm niin Central KTP hruaitu leh CKTP Ruihhlo Do Core Committee hruaitu mi 16 ten counselling class an neihpui a ni.

Ruihhlo ngai hruaikhawmte hi MSACS lamin HIV test leh Syphillis screening an lo neih pui bawk a, mi 52 te thisen la in vanduaithlak takin HIV+ve kaithar pawh hmuhchhuah an ni. He hunah hian Central YMA hruaitute, CEC te, CADS leh ZADS te bakah Central KTP hruaitu eng emaw zat leh Aizawl SP atangin Police mi 11 leh Excise and Narcotics Department atangin mi 12 te an thawk chhuak a ni.

Upper Republic Branch YMA-ten tlawmngaiin kalkhawmte eiturin sawhchiar leh thingpui an buatsaih sak a ni.