Sikul fai inelna tur hawn a ni

Vawiin (1.9.2026) hian UD&PA Auditorium-ah Swachha Bharat Mission 2.0 hnuaia Mizoram puma faina leh thianghlimna kawnga sikul inelna tur ‘Mizoram Green Schools League’ chu UD&PA Miinister K.Sapdanga chuan khuallian niin a tlangzarh a, Education Minister Dr Vanlalthlana chu khual zahawm a ni.

K.Sapdanga chuan UD&PA Department leh Education Department tangkawpa buatsaih,‘Mizoram Green Schools League’ kalpui tan tura tlangzarh a ni chu lawmawm a tih thu a sawi a, “Sikul naupangten faina leh thianghlimna an ngainat a, an puitlin thleng pawha an ni tin nunphunga fai duhna an nunpui tlat theihna tur inzirtirna tha tak a nih thu a sawi a. He inelna hian lawmman sum fai engemaw zah a ken tel chu thil lawmawm tak a nih rualin, lawmman dik tak zawk erawh chu school hrang hranga zirlaiten fai duhna thinlung an pu tur hi a ni,” a ti.

UD&PA Minister chuan hmasawnna leh changkanna tehfung pawimawh berte zing ami chu faina leh thianghlimna a nih thu sawiin, “Zirlai naupangteah fai duhna thinglung tuh nghet a, an sikul, an chhungkua leh khawtlang vawn faina kawnga hmahruaitu ni thei tura chher hi ‘Mizoram Green Schools League’ in a tum a ni. Kan ram hi kan tu leh fate, chhuan thar lo la awm zel turte tan a luah tlak, fai leh thianghlim taka enkawl hi mitin mawhphurna lian tak a ni,” tiin kan mawhphurhna hlenchhuak tur hian naupang atanga puitling thlengin chanzo pawimawh tak kan neih thu a sawi.

Khual zahawm Dr. Vanlalthlana chuan, tunlai hian faina kawngah mizo thlalaite an thangharh nasa hlea a hriat thu sawiin, mahni thu a mimal leh thianho tangruala hmun tawp leh bal lai deuhte tifaia an che chhuak hriat tur a awm fo thin, tih a sawi a, “Faina kawnga mizo thalaite hmalak thinna chu fakawm a tih thu sawiin, rel lo luh hnu pawh hian fai kan ngainatna hi khualzinte tana zirtlak leh entawntlak tura kan chhawm nun zel a pawimawh. Mizoram Green School League hlawhtlinna tur hian Education Department chuan theihtawp a chhuah dawn. Faina kawngah zirtirtute leh sikula thawktu zawng zawngte chu zirlai naupangte tana entawntlaka an awm a pawimawh ,” a ti.

Mizoram Green Schools League hi Block Level, District Level leh State Level-a kalpui tur a ni. State Level-a lawmman pakhatna Rs. 1,00,000, pahnihna hian Rs. 70,000 leh pathumna hian Rs. 50,000 a kengtel . District Level-ah chuan pakhatnain Rs 10,000, pahnihnain Rs 7,000 leh pathumnain Rs. 5,000 a kengte a ni.

Block level-a sikul titha 5 thlanchhuahte chu District Level-ah endik leh an ni ang a, District Level-ah hian a thazual 3 thlanchhuah an ni leh ang dawn. State Level-a inel turin district tin atangin a titha ber an tel dawn a ni. Ruahman dan chuan, School fai inelna endik hi October 12 atanga kalpui tan tur niin December 8 thleng awh tura tih a ni.

He hmalaknain a tumte chu sikul zirlaite hnenah bawlhhlawh thliar hran zirtirte, vawi khat hman plastic hmang lo tura inzirtirte, zirlaite ni tin nuna fai duhna seng luh tirte leh fai tura hmalakna hrang hranga hruaitu ni tura zirtirte a ni.