Sonam Wangchuk nen inkawm

MNF thuchhuah tarlan danin, tunlaia activist lar tak Sonam Wangchuk, engineer leh educator ni bawk chuan Delhi-a cham mek MNF President Zoramthanga chu appointment a dil angin nimin (September 28, 2026) khan Mizoram House, New Delhi ah a kawm a, darkar 1 leh a chanve chuang zet an inkawm a ni.

Zoramthanga leh Sonam Wangchuk inkawmnaah hian politics leh tunlai khawvel chungchang an sawi tam ber. Wangchuk hian Mizoram leh India inremna chu ropui a tih avangin zirchian ve a duh thu a sawi a ni. MNF President pawhin lawm taka lo dawng sawngin, he peace accord hi inremna tlo leh tluantling, hlawhtling ber a nih avangin mimal leh ram dangte pawhin zir thamah ngaiin an rawn zir fo tawh tih a lo hrilh. Sonam Wangchuk pawhin zir belh leh zirchian zel a duh a, amah leh Ladakh lama a ṭhiante nen Mizoramah emaw, a remchan dan anga inkawm a, zirchian lehzual a duh thu a sawi nasa hle.

MNF President chuan he inremna atana India Sorkar patlinzia sawi langin, Laldenga, electoral roll-a chuanglo kha India Sorkarin Interim agreement-ah ṭul an tih avangin Indian Constitution ang thlapa thlan tlin Mizoram UT Chief Minister Lal Thanhawla pawh an lantir duh a ni. Hei hian India Sorkarin remna a duhzia leh remna atan a man pek an inhuamzauzia a lantir a, he inremna tlo tak leh entawntlak ber pakhat neitu Mizoram mipuite hian hetiang inremna hi nei ve zel sela an duh thu Sonam Wangchuk hnenah hian a lo hrilh bawk.

Wangchuk chuan Zoramthanga chu fakin, ramhnuaiah kum 20 MNF underground movement-a awm tawh, kum 15 zet Chief Minister ni zui ta bawk leh, chawl miah lova kum 36 chhung MNF President-ah a ṭang thei chu mak a tiin a fak nasa hle a ni. Hun remchang la siamsak leh tur leh, Memorandum of Settlement zirchiang tura Mizorama lo zin a duh thu Sonam Wangchuk hian a sawi nawn bakah, MNF President Zoramthanga pawh Ladakh ah zin ve ngei turin a sawm nghal.

He inkawmnaah hian Mizoram House Kitchen siam Mizo chhangban kan leh Mizo thingpui nen Zoramthanga, MNF President leh Former Chief Minister ni bawk chuan Sonam Wangchuk hi a lo hlui a ni. A lehkhabu ziah ‘From Guerilla Fighter to Chief Minister’ leh, Memorandum of Settlement original scanned copy chu a hlan nghal.

Inkawmna hun ṭha tak an neih hnuah Zoramthanga leh Sonam Wangchuk chu an inthlah ta rih a ni.