News

September 11, 2026 tlaia tuihawk in a lak vanga thi Ruby Lalrinsiami (6) d/o B Lalbawiliana, Lawngtlai College Veng chhungte chu vawiin (14.9.2026) hian Lawngtlai Bawrhsap Donny Lalruatsanga’n an chenna inah sorkar atanga ralna a hlan.

Bawhsap chuan Ruby Lalrinsiami’n vanduaithlak taka nunna a chan chu sorkar leh a mimal ang pawhin an tawrhpui takzet tih sawiin, “Hetianga vanduaina a lo thlen palh takah chuan District Disaster Management Authority chuan a tihtheih ang ang a bawhzui nghal thin a, vawiinah ralna sum hlan a ni ta a ni,” a ti.

Mizoram Sawrkar chuan vanduaina tawh avanga nunna chante hi cheng nuai 4 in a ral thin a ni.

Ruby Lalrinsiami hi September 11 tlai khan ruah sur nasa tak karah dawra thil leitura a thiannu nen an kal chu tuiluankawrah chesual palhin, metres 300 vel tuihawkin a len a, a nunna a chan phah.