Sorkar leh ngei kan tum &#8211; Dr Thangtea

Aizawl North-I MNF Block chuan vawiin (25.9.2026) hian Bawngkawn Chhim Veng YMA Hall-ah ‘Headquarters Tlawhchhuah Programme leh Inhmelhriatna’ hun an buatsaih a, an hun hmanpuitu MNF Sr. Vice President Dr. R Lalthangliana, MLA chuan kut hnathawktute leh thalaite rilrem zawnga kal thiam a, ZPM sorkar paih thlain, sorkar leh ngei an tum thu a sawi…

MNF Sr. Vice President Dr. R.Lalthangliana chuan tun hma chuan kum 10 danah sorkar a inthlak thin thute sawiin, “Tunah chuan thil a inthlakthleng zo tawh. Keini pawh 2018- 2023 (kum 5) kan sorkar hnu khan beisei loh takin kan tla a ni. ZPM pawh nizan thlengin an Val Upa Council thlengin an inbansan ta zel. Kum 2028-ah ZPM hian an beisei ang an pha bik dawn lo, keini chuan kut hnathawktute leh thalaite rilrem zawnga kal thiam a, ZPM sorkar paih thlain sorkar leh ngei kan tum a ni. Kum 10 chuang zet kal ta a, SEDP kan duan kha tunah chuan siamṭhat a lo ngai ta a, a aia tha kan duang mek a, kan zo tep tawh,” a ti.

Kut hnathawktute, a bikin thingtlang lonei mite mumal leh hlawk leh zualin chawikanna tur an duang mek tih sawiin, “Thlai hralh thei loh leh dah ṭawih mai maite awm tawh lovin mechanise a, tunlai mil ang zela ram pawna hralh chhuah tlaka sawngbawl te, thalai lehkhathiam leh thiam lote tan eizawnna ngelnghet nei tura ruahmanna tha tak kan ngaihtuah bawk. Aizawl khawpui chhungah mirethei kan tam em em a, hengte dawm kanna tur atan hian ruahmanna tha tak kan siam bawk, sem ni kher lovin bul tanna tur ngaihtuahsak kan tum,” tiin ,mithiam rualte nen ruahmanna an siam puan chhuah an hmanhmawh vak lo a, a hun takah an puan mai tur thu a sawi.