Nizan (November 20,2026) khan MNF Gen.Hqrs. in Mizoram hmun hrang hranga MNF Block, Group leh Unit tlawhchhuah runpui November thla chhunga a kalpui mekah Serchhip bial chhung bik tlawhchhuah kharna hun New Serchhip Bazar Hall-ah buatsaih a ni a, MNF NCC member K. Vanlalvena, Ex. Rajya MP chuan a hmanpui.
K.Vanlalvena chuan thu sawiin, “Zaninah MNF hlang, chalpen ngam hetiang zata tam kan kalkhawm thei hi a lawmawm ka ti. Pathian zarah sorkarna kan chang leh thuaiin ka ring. Kan party hruaitute pawh hi tawngtaipui thin ang u tiin a sawm nghal a ni. ZPM ministry corrupt zia hi a bua chhuah tham a ni tawh. Pu Duha leh a hote hian Pathian hi an bum nawn theih ka ring lo. Mipui pawh min bum nawn kherin ka ring lo,” a ti.
ZPM chu inthlan hmain an inkokhawm a, thu an tiam rual dual dual nia sawiin K Vanlalvena chuan, “Chhung leh khat leh party induhsak bikna lakah ka fihlim ang, tih te an tiam a nih kha. Kan hriat vek angin ZPM Party hi an sorkar hma khan an intiam nasa em em a, kan ti lo ang an tih kha an ti char char. Kan ti ang an tih ho an la tihlawhtling lem lo,” tiin pastor-te meuh pawh biak inah an auchhuah tak hial a nih hi. CM Special Package leh Bana Kaih Policy-ah ZPM Party mi hlir an thlang hi sorkar kaltawhte huna la awm ngai lo a ni tiin an auchhuak mek a,” tiin neutral zinga enchhin duhtu hoin an hlatsan mek niin a sawi.
MNF NCC Member chuan Lalduhoma’n CM a nih chhunga hmalakna tam tak chu hnam hralhna a nih thu sawiin, “MNF-in kan phal miah loh thil kha awlsam takin a hralh mai zel a ni. Hnam pawi a khawih nasa hman em em. Hei hi thangtharten an rawn pholang chiang zel dawn a ni,” a ti.