Home

News

Thiam chantir leh chhan a hriat tawh

News

Thiam chantir leh chhan a hriat tawh

Thiam chantir leh chhan a hriat tawh

September 1, 2026 khan Gauhati High Court chuan ruihhlo man thubuaia kum 10 lung in tang tur leh Rs. 1,00,000/- chawi tura Special Judge, NDPS Court, Champhai-in hremna a pek tawh chu a thiat a, he thubuaiah hian thiam a chantir.

Ni 26.04.2023 khan Tuisenphai Check Gate-a police duty-te chuan Hyundai i20, Lalrosanga leh rinhlelh dang mi pakhat Joseph Laldingngheta te chuanna chu ringhlelin an tiding a ni. An car an dap hnuin, car hnung atangin sahbawn bawm 80 chuanga dah, heroin grams 894.18 an man. Investigation neih zawh a nih hnuin police-te chuan chargesheet an thehlut a. Special Judge, NDPS Act, Champhai, chuan an pahnih lakah hian charge a siam ta a ni .

Trial neih a nih lai hian prosecution lam chuan seizing officer, independent seizure witness pahnih, constable (PW-4), leh Investigating Officer-te thu a zawt fiah a ni. October 18, 2024 khan Special Judge, NDPS Court, Champhai chuan NDPS Act Section 21(c) leh 25 hnuaiah Lalrosanga chu thiam loh a lo chantir tawh a ni. Trial court chuan kum 10 chhung lung in tang tur leh cheng nuai 1 chawi turin a hrem.

Lalrosanga hian he thutlukna hi pawm loin Gauhati High Court-ah criminal appeal a thleh lut zui a, Justice Kaushik Goswami chuan appeal hi pawmsakin, trial court-in thiam loh a chantirna leh hremna a pek chu a tihtawpsak a, thiam chantir ta a ni.

High Court hian a rang lama chhuah zalen a nih ngei nan release order chhuah vat turin leh, thuneitute hnenah hriattirna thawn nghal turin Registry a hrilh.

Thubuai thehluttu tana ding ukil chuan Trial Court-in thiam loh a chantirna hi dan kalh a ni tiin a sawi a, ruihhlo mannaah hian NDPS Act hnuaia dan zawm ngei ngei tur, abik takin Section 52A hnuai a mite chu zawm a nih loh thu a sawi a bawk. Tin, thubuai thehluttu hian ruihhlo chu plastic bag-ah kengin, a hnuah motor hnungah a dah tia prosecution lamin an puhna chu Section 313 CrPC hnuaia examination-ah chuan zawh a nih loh thu tarlan a ni.

Thubuai thehluttu hi he ruihhlo neitu ngei hi a ni em tih chu Prosecution lam chuan rinhlelhna tur awm lo khawpin an finfiah theih loh thu a sawi bawk.

High Court chuan finfiahna awm zawng zawngte uluk taka a enfiah hnuin, prosecution case chu thiam loh chantirna turin a chak tawk loh thu an sawi. Ruihhlo chu Lalrosanga hnen atanga man a ni lo a, ruihhlo manna a independent witness chuan thubuai thehluttuin ruihhlo a keng lai leh motor chhunga ruihhlo a dah lai a hmu lo. Tin, Investigating Officer pawhin motor chhunga heroin a dah lai a hmuh loh thu a sawi bawk. Court chuan ruihhlo manna a witness dang, constable pakhat chu witness anga koh a ni lo tih a hmu a ni.

Thubuai thehluttu leh an ruihhlo man te hian inzawmna an nei ngei a ni tih finfiah theitu witness awmchhun chu PW-4 a ni. He witness ngei pawh hian thubuai thehluttu chu motor pawna a awm laia tih din a nih tawh laiin, ruihhlo chu motor hnunga a dah dan a sawi thei lo a bawk. Tin, IO chuan motor-in check gate a paltlang lai hian heroin chu motor chhungah a awm lo a ni tih a pawm a ni.

High Court chuan Trial Court-in thubuai thehluttu leh rinhlelh dang mi pakhat thiam loh a chantirna chu ruihhlo an hmuhna motor-a chuang an nih vang chauh niin a lan thu a hmu a; amaherawhchu, High Court chuan chu ringawt chu ruihhlo neitu ngei an ni tih finfiahna atan a tling tawk loh thu an sawi. Court chuan prosecution lamin an puhna lian tak chu Section 313 examination-ah zawh a nih loh thu a hmu. An puhna lian tak chungchanga insawifiah theihna hun pek a nih loh vang hian, thiam loh chantirna atan a hman theih loh thu Court chuan a sawi a ni.

Source : www.jclalnunsanga.in

More Posts

Aizawl DM-in thupek a chhuah

Aizawl District Magistrate chuan MZU Convocation hmang tura President Draupadi Murmu lokal dawn vangin, ni thum chhunga Lengpui leh Lok Bhavan inkar (via Sakawrtuichhun), Lok Bhavan leh MZU inkar kawnga ni thum chhung zawm tur a tarlang. MAGISTRATE THUPEK : Hon’ble President of India chuan November, 2026 chhung hian Mizoram University (MZU) ah 21 Convocation […]

PIXSELL tlangzarh a ni

Vawiin (21.11.2026) hian Lengzem Editor Vanneihtluanga’n MZP Conference Hall-ah awlsam zawk leh man tlawm taka thlalak lei leh hralhna application, PIXSELL tia vuah chu a tlangzarh. He application hi thla latute thiamna leh zahawmna vawn himna tur, tu pawhin mahni bakah thlalak duhzawng lei leh hralhna remchanga an hman theih tura duan a ni. PIXSELL […]

Kum 12 min tuiah a tla

Vawiin (21.11.26) chawhma dar 11:30 vel khan Ramlaitui khuaa kal tur Lahruaitluangi (12), Peniel Veng, Hnahthial chu Mat Luiah chetsualin tuiin a la a, he thuziahlai hian zawn mek a ni. Thudawn danin, tukin tukthuan eikham khan Lalhruaitluangi hi amah enkawltu a pi leh pute nen Ramlaitui khuaa Lalhruaitluangi nu ute tlawh turin Hnahthial atangin […]