News

Vawiin (21.8.2026) tlai khan Tourism Minister Lalnghinglova Hmar chuan Multipurpose Hall, Berawtlangah, ‘Development of Beraw Tourist Resort’ project hnuaia khualbuk sak thar a hawng.

Tourism Minister Lalnghinglova Hmar Mizorama khualzinte thlenna tur khualbuk thar changtlung tak hawn theiha peih a ni ta chu lawmawm a tih thu a sawi a, “Mizoramah chuan hnamdang khualzinte tana tlawh manhla tak tak tur thahnem tak a awm. Tunhnaiah Mizoramah tourist an pung nasa a, tourism sector chu Mizoram tan sum hai luhna hnar tha tak a ni chho mek,” tiin khualbuk hawn thar chu tourism sector tana hmasawnna a nih ngei a beisei tih a sawi.

Lalnghinglova Hmar chuan kum 2024-2025 aiin 2025-2026 chhung hian Mizoram tlawhtu khualzin nuai 4 chuangin an pung tih sawiin, “Ram pawn atanga lo kal pawh kum hmasa aiin 9,000 chuangin an pung. Tourism sector hi mi tam tak tan eizawnna siamsak theitu a nih avangin, sawrkar leh mipui tanrual a ngai a, khawtlang hruaitute nen pawh inhrethiam taka thawh ho a tul a ni,” a ti.

Tourism atanga hlawkna tak tak hmutu tur chu Mizoram mipuite an nih avangin, ram hmasawnna tura theihtawp chhuahpui zel turin Tourism Minister chuan kalkhawmte a fuih a ni.

Development of Beraw Tourist Resort project atan hian cheng nuai 606 sen a ni. Khualzinte thlenna tur khualbuk (building) panga hawn thar niin, bedroom pahnih theuh a awm a, a bang atan hian hmun hrang hrang atanga lakkhawm lung tha bik hman niin, a chhung pawh khualzinte tana nuam thei ang ber tura chei mawi a ni.