Union Minister-in hmarchhak Power Minister-te a kawm

Nimin (25.8.2026) khan Union Power Minister Manoharlal Khattar chuan a office-ah North Eastern Regional Power Committee hnuaia hmarchhak state Power Minister-te a kawm a, India hmarchhaka power sector tihchangtlunna tur rawtnate leh mamawh hrang hrangte an sawipui a, smart meter vuah hna kalpui mek chu ngai pawimawh turin a chah.

He inkawmhonaah hian NERPC Chairman Metbah Lyngdoh, Meghalaya Power Minister Mizoram Power Minister F Rodingliana leh Arunachal Pradesh Deputy Chief Minister Chowna Mein leh hmarchhak state dang official-te an tel. Hmarchhak State Minister-te hian regional power grid tihchangtlunna tur pawimawh hrang hrangte thlenin grid modernisation kalpui tur hian sum mamawhte ngaihtuahsak turin an ngen a, Power System Development Fund (PSDF) kalpui dan tihdanglam a nih tak avanga hmarchhak state hrang hrangin Project an thehluh tawhte special assistance kaltlanga tihhlawhtlin sak turin ngenna an thlen a ni.

North-east state te tana project pawimawh bik, Priority project te thlen niin, chung zingah chuan SCADA/EMS project leh Emergency Restoration System(ERS) tihpuitlinna tur ngaihtuahsak te a tel a ni.

India hmarchhak chu tlangram chhengchhia a nih avanga project leh hna dang thawhna kawnga harsatna an tawh thinte Union Minister hnenah hian an thlen a. Tlangram hmun kilkhawra khaw inhlat tak takah current pekna transmission line thui tak kaltir a ngaih thin avangin power supply chatlak loa pek kawngah harsatna a siam nasa a. Hei vang hian hmun kilkhawr zawkah Sub-Station dah belh a tulzia Union Minister hi an thlen a ni.

Mizoram Power Minister F Rodingliana chuan hmarchhak tihhmasawnna tura ruahman, Power Ministry 54 ten an budget atanga 10% zel hmarchhak tana an dah hranna tur, 10% Gross Budgetary Support (GBS) hman kawngah langtlang zawk leh tangkai zawka hman a nih theih nan ruahmanna siamsak turin Union Minister Manoharlal Khattar chu a ngen a, a bikin power sector tihhmasawn nan 10% GBS atanga sum tam zawk dah hrang turin a ngen bawk a ni.

Manoharlal Khattar chuan hmarchhak state ten power sector tihchangtlunna tur sum mamawh an thlente chu Union Finance Minister a lo sawipui tur thu a hrilh. Amaherawhchu, project sum mamawh zawng zawngte Sawrkar Laipuiin a tum vek theih dawn loh avangin state nen tangtlanga tih a ngai dawn a; state-ten engzatnge an tumve theih ang tihte chhut a, ruahmanna felfai tak siamho hnuah, Ministry of Finance lamah nawr zui a nih tur thu a sawi.

Union Power Minister hian smart meter vuah hna kalpui mek chu ngai pawimawh turin leh zawh vat a nih theih nan chak taka hma la turin Minister-te chu a ngen a, mipuiten smart metre hna thawh dan dik tak an hriatthiam theih nana ‘check-meter’ vuah chu ngai pawimawh turin a chah a ni. Union Minister hian amah tlawhtu hmarchhak state-a minister-te chu transmission lost ti tlem tura hma la zel turin leh a theih ang chin chinah commercialization lam hawi turin a lo chah bawk a ni.

Hmarchhak State Power Minister te intelkhawmna North East Regional Power Committee(NERPC) hi Electricity Act 2003 behchhana Ministry of Power hnuaia din a ni a. North East State 7 te member niin, chairman hi an in nih chhawk thin a ni. Tunah hian Meghalaya Power Minister chu chairman ni mekin, term leh hi Mizoramin chairman hna a chelh hun tur a ni. Tun tuma hmalakna hi March ni 11, 2026 a 31st NERPC Meeting, Aizawla nghah a nih tuma thurel bawhzuina a ni.