News

MNF chuan Aizawl huam chhunga constituency hrang hranga MNF Block tlawhchhuah programme chu hman an hman chhunzawm zel a, vawiin (24.9.2026) hian Aizawl West-I, block-II te tlawhin, Sairang VC Hall-ah hun hman a ni a, thusawitu MNF Treasurer Lalruatkima chuan ZPM chu ZNP fir pawlah an chan chhoh mek thu a sawi.

Lalruatkima chuan, “Kan sawrkar kal mek dinhmun thlirin, ram leh hnam tana thil tha lo lam kawng an zawh takzel a vangin, dik tak leh tha taka kal beiseina neitu ten an tlansan mek a, an hotu lawk, VUC member hialte pawhin an bansan zel a ni. ZPM huang chhunga pawl hrang hrang infin khawm chu ZNP fir pawlah an chang chho mek. An dan tidanglama an CM leh a thurualpuite tundin zelna, lal ngai lo lal zia alo lang chho zel. Titanic lawng kehchhe pil meka chuang, a fing hmasa in dam khawchhuahna dapa an zuang chhuak mek ang kha an ni. Manganga tal mekte chu chhanchhuahna lawng MNF-ah lo chuang zel turin kan sawm takmeuh a ni,” an ti.

Ram tana thil pawi an tihin, kan nitin ei hmuhna tam tak a ti khawlhkham chho zel tih sawiin MNF Treasurer chuan, “FCAA 2023 an adopt avanga kan leilung behchhana eizawng mekten harsatna tamtak an tawk hi a pawi kan ti a, sawrkar thara arang thei ang bera an harsatna hi phuhruk a ngai a ni. Kan ram hi kan hnam, kan sakhaw himna a nih zel a, thangthar lokal turte chen zelna tlaka him leh thlamuanga siam a ngaih laiin, tunah chuan thlaphanna in a man mek. Chhanchhuak tura MNF sawrkar a ngaiin, chutiang tur chuan MNF chuan thatawp chhuahin hma kan la mek a ni,” a ti a, danglam ngam, dik ngam, huaisen ngam, tlawmngai zel tur MNF an nih zel a tul thu a sawi.