ZPM Thalai thuchhuah chhanglet

MNF Thalai chuan thuchhuah siamin, Aizawl khawpui chhûnga tui luan kawr siamna atân SASCI Part-10A 2025-26 hnuaiah cheng vaibelchhe 5 hmuh niin, hei hi ZPM kaihhruai AMC chuan municipal ward hrang hrangah sem chhuakin, opposition bial awm chhun pahnih AMC Ward No.IX leh XIX te erawh sem an ni ve lo tih an tarlang.

MNF Thalai tarlan danin, he thil avang hian Ward No.XIX Corporator Dr. Lalmalsawma Nghaka leh Ward No.IX Corporator B. Lalawmpuii te chuan AMC nodal department changtu UD & PA Minister K. Sapdanga hmuin an ward laka hleih bikna thleng chu pawi an tih thute, thil la thleng ngai lo a nih thu te hrilhin, an harsatna tawhte chu chinfelsak turin an ngen a ni. An Ward mipuite chu SASCI loan rul tu turte an nih ve tho thu pawh an thlen.

Hemi chungchangâh hian ZPMThalaite chuan thuchhuah siamin, eptute’n ZPM sawrkar chu AMC Ward No.IX leh XIX te Ward Fund pe ve loah puh mah se, AMC Ward tinte Ward Fund ₹10,00,000/- pek an nih thu an tarlang. Ward Fund ₹10,00,000/- dawn ve loh chungchâng hi engtik lai maha eptute emaw Ward No.IX leh XIX Corporator-te’n an sawi miah lo laia heti zawnga ZPM Thalaite’n insawifiahna thuchhuah an siam ta mai te, an Media and Publicity Chairmam Minister B Lalchhanzova thleng thlenga a phur phura an tang ta mai hi MNF Thalaite chuan a mak an tiin thu dik tawk lo hmanga insawifiah fo mai hi kalphung thar chu em ni tih hi an zawhna a ni. ZPM Thalai thuchhuah siam dan hi mipui bum tumna leh rilru hruai kawina tumna mai niah an ngai bawk a ni.

Tin, Ward XIX corporator Pu Lalmalsawma Nghaka leh Ward IX corporator B Lalawmpuii te’n an bial chhunga SASCI hnate chu ZPM workers-te thawh tho tur a nih thu UD&PA Minister hnena an lehkha thehluha chiang taka an ziah lan reng chung pawha ZPM Thalaite’n Ward IX & XIX corporator te chu SASCI hnathawh anmahni kuta a tlâk loh avanga zualko ta chiam anga an puh ta mai hi a pawiin ward mipuite zah lohna lian takah an ngai. Ward No.IX & XIX Corporator-te hi an ward mipuiten an chanvo an hmuh theihna atana UD&PA Minister hnena kal mai chauh an ni tih hi ZPM Thalaite hian lo hre bawk se tiin MNF Thalaite’n an chah a ni.