Amah pawhin a awih loh tur sawi thinah CM puh

Vawiin (August 17, 2026) hian MNF chuan an office-ah chhung inkhawm an hmang a, thusawitu MNF General Secretary Lalpianfela Chawngthu, Vice Chairman, Legal Board chuan Chief Minister Lalduhoma chu amah pawhin a awih loh tawp tur, thu âtthlâk leh mak pui pui, tun hmaa a thusawi thin letling thawka thu a sawi thin thu sawiin, “A bkin Gen Z te ngaihtuahna hruai kawi tumin nasa takin a hmanhlel,” a ti.

Lalpianfela chuan tun hnaiah CM Lalduhoma chuan an party chhugkaw boruak chhe tak leh a kaihhruai sorkara eirukna thubuai lian tak Lengpui ram hralh chungchanga mipui rilru hruai kawih nan amah pawhin a awih loh tawp tur thu atthlak leh mak pui pui, ram leh hnam tana pawi thei tak, tun hmaa a thusawi thin letling thawk sawiin a hmanhlel mek nia sawiin, “ILP leh Article 371G chungchang leh Mizoram peace accord chungchangahte MNF dah hniam tum ran leh khanglai hun hre phak lo Gen Z te ngaihtuahna hruai kawih tuma heti taka a hmanhlel hi a pawi takzet,” tiin ngaihdam dil se, duhtawk tawh se ama zahawm nan pawh a that tur thu a sawi.

MNF Legal Board Vice Chairman chuan, “Mizoramin Human Rights Commission hlau CM, human rights awmzia pawh man lo, CM, Law Minister ni bawk kan nei hi kan vanduai hle. Ram changkang apiangah dan a lal a, dan rorelna humhim a nih bakah mipui an zalen thin a ni. Kum 1215 khan English ho chuan rule of law, lal meuh pawh dan rorelna chungah a awm thei lo tih an buaipui tawh lai leh chumi atanga kum 800 chuang a ral tawh hnu kum 2026-ah pawh kan CM leh Law Minister ni bawkin dan piah lama chetna – mob rule la duh zawk niawm taka thu a la sawi hi a pawi em em a, a zahthlak bawk a ni. Kan Law Minister hi ‘Law Minister’ ni tlak pawh a ni lo va, ‘Low Minister’ a lo ni zawk tih a lang chiang hle a ni,” a ti.

Gen Z te hi kan duh emaw, duh lo emaw nakin lawka kan ram hruaitu turte an nih thu leh an nih chhoh mek thu sawiin Lalpianfela chuan, “Dikna an duh a, corruption an duh lo a, dik lo taka induhsakbikna ang chite an duh lo bawk. Hruaitu tha an mamawh a, an zawng mek bawk. Mizoram tha zawk an duh a, chutiang tur chuan keini tuna politics khawvela awm mekte hi min beisei a, an beisei ang taka kan awm leh ram kan kaihhruai hi a ngai a ni. Gen Z te hi naupang chhia an ni tawh lo a, ngaihtuahna puitling tak neiin hma an la a, an ni ang kumah hian kan hnam Pa Pu Laldenga leh a thawhpuite khan Mizoram tan zalenna an lo sual tawh a, hnam movement lian tak an lo kalpui tawh a ni,” a ti bawk.