AR Biak In chhuhsak an tum &#8211; MNF

MNF Legal Board chuan vawiin (7.11.2025) hian Aizawl Press Club-ah press conference neiin, ZPM Sorkar chu dik lo taka Assam Rifles Biak In hmun chhuhsak tumah an puh a, thudik lo nen hma an lak thu an sawi.

MNF Legal Board Vice Chairman Lalpianfela Chawngthu chuan May 5, 2025-a Chief Minister Lalduhoma hoaAssam Rifles chhuahsan ram enkawl zui dan tur ngaihtuahtu thuneitu sang ‘Advisory Committee on Assam Rifles Land Handed Over to the Government of Mizoram’ thukhawm chuan Assam Rifles Kohhran Biak In hmun hi sorkar kuta a luh theihna atan Synod dawrtu tur an inruat tih sawiin, “ZPM Sorkar ngenna chu Synod Officers Meeting chuan ngaihtuahin, Synod Executive Committee (SEC)-ah an thlen a, SEC chuan Assam Rifles Biak In hmun hi kum 1950 hma lama Mizoram Bawrhsapin Assam Rifles-a Mizo awmte inkhawmna tura a lo pek tawh thu te, he biak in hmun hi Assam Rifles ram ni loin, ram awl, biak in atana piak liau liau a nih thute sawi lan a ni. Sorkara hlan chu remchang loah an ngai,’ a ti.

SEC-in zai dawh taka ngaihna a thlen chu ZPM Sorkar chuan zahsak a hnekin, biak in hmun hi Assam Gazette Notification’ leh ‘The Mizoram (Restriction on use of Transferred Land) Act, 2002’ hnuaiah rinluh ve nia sawiin, kum 2011-a sorkar land lease a lo pek pawh felhlel angin an sawisak nia sawiin Lalpianfela Chawngthu chuan, “Hei bakah hian CYMA-in High Court-a PIL an thehluhnaah he biak in hmun hi a tel ve anga sawiin, rambuai, court-a inchiah mek angah a chhuahsak ta hlauh. Court thutlukna nghak turin Mizoram Synod pawh hriattir nise, tiin thutlukna an siam zui leh ta zel a ni. He thutlukna mak tak hi Mizoram Sorkara GAD Principal Secretary chuan SEC hnenah ziakin a hriattir,” tiin High Court thu chhuak a awm hma chuan tu tan mah he biak in hmun ram neitua inchhal a rem loh thu SEC hi hi an hriattir thu a sawi.

Lalpianfela Chawngthu chuan ZPM Sorkar atanga lehkha an dawn an bawhzuinaah Synod Sr Executive Secretary chuan CYMA hnenah High Court-a PIL an thehluhah Assam Rifles Kohhran Biak In hmun ram a tel ve em tih a zawtfiah ta tih sawiin, “CYMA General Secretary chuan chhangin, court-a an thu thehluah a telve loh thu fiah takin a hriattir. Hetianga ZPM Sorkarin thudik lo nen lam, chhuanlam tur dapkhawm chawpa kohhran thlenga thupek khauh tak a pe duh zel te, CYMA lehzel pawh thudik loa puh tel duhte hian thin a ti thawng takzet. AR Kohhran Biak In hmun chhuh luih tumna hi a zahpuiawm takzet. ZPM hian an office atana an awt takzet a nih chuan zahpawh dawn loin a neitu dik tak Synod dil mai turin thurawn kan pe a ni,’ a ti.