May 21, 2026
Thursday
May 18, 2026 (Thawhṭanni) khan Gauhati High Court, Division Bench Justice Michael Zothankhuma leh Justice Sanjeev Kumar Sharma-te chuan Aizawl khawpui kawng tih zauna tura Assam Rifles ram chhuahsan taka thing kih chungchang thubuai chu ngaihtuah leh.
He thu an ngaihtuah lai hian, Advocate General chuan a tirah chuan thing 170 lai kih tura ruahman a nih thu leh thing 107 kih phalna hi an hmuh tawh thu a sawi a, amaherawhchu, sawihona leh inrawnkhawmna hrang hrang an neih hnuah heng thing zinga 53-te chu zuah theih a ni tih an hmuh thu leh thing 44-te chu kih tawh a nih avangin, thing 10 kih hmabak a la awm thu a tarlang. Tunah dinhmunah hian Mizoram Sawrkar chuan thing 23 kih an la mamawh thu court-ah a thlen.
Mizoram Sawrkar tana ding Advocate General hian court hnenah hian thing kih takte aiah hian thing tiak 2,000 zet phun an tum thu leh he thingphunna atan hian cheng nuai 47.34 sanction a nih tawh thu a sawi.
Court chuan kar khat chhung ngei a affidavit thehlut turin Mizoram Sawrkar hi a hriattir . Tin, affidavit-ah chuan an thingphun tur hming hrang hrangte, khawi hmunah nge phun an nih dawn tih te, thing kih tura chhutte len zawng, leh thing kih tawhte chu eng anga tihral nge an nih dawn tih chungchangte tarlang turin a hriattir a ni.
He thubuai hi May 26, 2026-ah ngaihtuah leh tura dah a ni
Thulakna : www.jclalnunsanga.in
