Artuia intodelh turin hma la

Tawi Bialtu MLA Prof. Lalnilawma, minister of state chuan vawiin (21.5.2026) hian artuia intodelh theihna atan MLA fund hmang tangkaiin hma a la.

Prof. Lalnilawma hian vawiin (21.5.2026) hian a bial chhung Selingah ‘Livelihood Mission: Artui a Intodelh tura Bana Kaih (Handholding) Project’ a hawng. He project hian Seling, Thingsulthliah, Thingsul Tlangnuam leh Tuikhurhlute a huam phawt dawn a, a bial chhung khaw dangte pawh a huam chho zel ang.

Pilot project atan Seling, Thingsulthliah, Thingsul Tlangnuam leh Tuikhurhlu atangin ar a tui cham chi (White Leghorn) vulh turin chhungkaw 20 thlan an ni. Chhungkaw 20 te hi ar in sakna tur rangva bakah ar note 100 theuh pek an ni.

Ar note man chu Prof. Lalnilawma’n MLA fund atangin 75% a tum a, benificiary-ten 25 an tum thung. Ar chaw man chu thla 5 chhung MLA fund atangin 75% leh benificiary-te’n 25% an tum ang.

Prof. Lalnilawma chuan sorkarin kut hnathawktute hi a ngaipawimawh tih sawiin, “Mahni kea an din theih nan sorkarin a theih ang angin hma a la mek a ni. Mizoram artui state dang atangin kan lalut nasa hle. Artui thar tha zawk kan hmuh theihna atan ka MLA fund-in kan bialah ngei hmalak tha ka ti a ni,” a ti.