News

Vawiin (June 3, 2026) a Mizoram Congress Pradesh Committee (MPCC) thuneitu sang PAC thukhawm chuan “ZPM sorkar in fuel cess a lak mek hi mipuite a lainat a nih chuan titawp rih rawh se” tiin ngenna a siam a ni.

Tun hnai lawk, May 29, 2026 khan MPCC Dr. Treasurer Lalmalsawma Nghaka hoa press conference-ah Mizoram sorkar chu fuel cess lak titawp tura an lo ngen tawh ang khan MPCC PAC chuan, mipui phurrit nasa zual zel chhawk zangkhai a nih theih nan fuel cess sang tak lak mek hi tihtawp nghal a ngen a ni.

Fuel man sang zelin India ramah harsatna namen lo a thlen mek tih tarlangin MPCC PAC chuan, “Fuel man sang hian hnathawk tura kal velna leh bungrua phurh mante a tisang zel. India hian crude oil te ram danga atanga a chawkluh tlat avangin rupee hlutna tlahniam zel chuan ram chhungah fuel man a tisang zual zel bawk a ni. Chu chuan inflation tisangin, ei leh in, nepnawi, delivery leh public transport thlengin a tisang nghal zel,” an ti.

MPCC PAC chuan khawvel pum huapa fuel lama harsatna awm mek lai leh India ramah pawh harsatna nasa tak kan tawh mek lai a ni tih tarlangin, “Central Sorkar thuchhuak anga Mizoram Sorkar ngei pawhin fuel inrenchem a kalpui mek lai hian fuel cess sang tak a lak mek hi la tawh rih lo turin kan ngen a ni,” tiin Mizoram Sorkar an ngen.