News

Chhinga Veng Thalai Pawl chuan thuchhuah siamin, tunhnaia Chhinga Veng leh Dawrpui inkara inhriatthiam lohna lo thleng pawi an ti hle tih tarlangin, “He thil lo intan dan Mizoram mipuite hriatah sawi lan tha in kan hria a ni,” an ti.

Tun hma in ramri buai an neih an hre ngai lo tih tarlangin Chhinga Veng Thalai Pawl chuan, “Electric Veng Sakawrpului atanga Bazar pan chhohna atanga ABC lane hi pi leh pu atanga Chhinga Veng chhung a ni. Kum 2020-2021 Covid len lai khan helai area ah hian Dawrpui lamin dawr in khar tura hriattirna lehkha an rawn sem a, Chhinga Vengin an veng chhung a nih avangin dawr in hawng turin an hrilh ve leh a ni. Kum 2025 kum tawp lam khan Chhinga Veng Local Council leh NGOs te chuan Chhinga Veng chhunga dan phal loha sumdawngte titawp turin hma an la a, vai sumdawng tam tak pawh tihtawp tir an ni,” tiin March 2026 khan Dawrpui Local Council chuan ABC lane a awmte chu Dawrpui Veng hming lanna sign board tar turin an hriattir tih an tarlang.

Chhinga Veng Thalai Pawl chuan Y.M.A day tuk, ni 15.6.2026 khan Dawrpui hnatlang chuan Chhinga Veng chhungah hna an rawn thawk tih tarlangin, “Tawngkamin Chhinga Veng KTP leh Y.M.A building te chu ‘Dawrpui Venga awm in ni e’ tiin an sawi. He thil hi hrethiam lovin Chhinga veng thalaite kan che chhuak ta a ni,” an ti.

Ni 16.6.2026 zingkara Chhinga Veng Thalai hnatlang thenkhatin an Veng chhunga Armed Veng Kohhran Thalai hoarding tar an lo la thla palh a, a pawi an ti tak zet tih tarlangin, “An mi ngaihdamna pawh kan dil a, hoarding te hi thalai ten an tar tha leh vek tawh. Chhinga Veng hi Aizawl a veng hlun tak zinga mi a ni a, 1912 ah Pi Phiri m/o Rev. R. Lalengkima te pawh awm tawhin 1932 ah phei chuan in 25 lai a lo ding tawh a, Dawrpui Veng atanga indang nilovin, kohhran erawh chu Dawrpui Kohhran atanga indang a ni,” tiin an veng humhim tur hian Chhinga Veng Thlai Pawl chuan hma an la zel dawn tih an tarlang.