News

Vawiin (5.8.2026) hian Chief Minister Lalduhoma chuan Assam Royal Global University, Guwahati, Student Induction Programme – Deeksharamb chu khuallian niin a hmanpui.

Thu sawiin Chief Minister chuan kawng tinrenga inmamawhtawn kan nih avangin boruak ralmuang tak kan siam zel a tul tih sawiin, “Assam Chief Minister nena kan inkawm tum pawhin kawng tinrenga boruak tha siam dun chu tha kan ti a ni. Tun hnaia Assam state-in tuilian nasa tak a tuar chu Mizoram mipuiten kan tawrhpui. Nunna chan te, chin hriat loha awm mekte leh in leh lo chante kan lainat em em a, in chanchin hi kan ngaihven reng a ni,” a ti.

Mizoram chu Assam state atanga indang kan nih thu sawiin Lalduhoma chuan, “State inthenawm kan nih angin thil tam takah kan inmamawh tawn a, hmasawnna kawngah tum thuhmun neiin kan kal a, mihring pawh kan inkalpawh tam. Assamese tam tak Mizoramah an chenga chutiang bawkin Mizo tam tak Assam-ah an khawsa mek a ni. Assam mi leh sa, Mizorama cheng Assam Culture Society of Mizoram May 11, 2024 khan Rongali Bihu Vanapa Hall-ah an buatsaih a, ka telpui nghe nghe,” tiin thlamuang taka awm tura a hrilh thu a sawi.

Assam Royal Global University hi kum 2017 a din a ni a, tunah hian academic programme 130, faculty 500 vel neiin zirlai naupang pawh 9000 chuang an nei. Foreign student pawh ram 28 atangin mi 400 chuang an nei mek a, Assam state-a university tha ber pawla ngaih a ni.

Kumin Student Induction Programme hi ni 19 chhung awh turin an kalpui mek a, ram hrang hrang 28 atanga kalkhawm zirlai tharten univesity an hriatchian theih nan te, an zinga inpawhna tha a awm theih nante he hun hi an hmang.