CM-in a sawi loh tawp tur a sawi &#8211; K Vanlalvena

MNF chuan vawiin (10.8.2026) hian an office-ah chhung inkhawm an hmang a, thusawitu K Vanlalvena, Ex. Rajya Sabha MP chuan Article 371 (G) leh ILP chungchang sawiin, “Kan Chief Minister-in a sawi loh tawp tur a sawi,” a ti.

K Vanlalvena chuan tunhnaia Chief Minister Lalduhoma thusawi sawi chhuakin , “Kan CM hian a sawi loh tawp tur a sawi a ni. Ram hruaitu kan nih chuan kan tawngkam hi silai; a mu pai ang anih avangin den a nei ngei ngei thin. Opposition hruaitu a nih laia duhdah taka thil a sawi thin anga tawng mai mai hi a dik tawh lo tih kan CM Pu Duha hian a hriat a ngai a ni. Chief Minister vekin, Mizoram Autonomous Dist. Council-te chauh Tribal area anih tawh thu leh Mizoram hmundang zawng zawng hi hlauhthawn awm ni a a sawi pawh hi thudik lo a ni. Indian Constitution Article 342-a Tribal list-ah Mizo kan tel a, Article 371(G) ahte Mizorama hnamdangten hmun lo ram an neih theihlohna tur dan a awm,” tiin chuvangin, hlauhthawn tur a awm loh thu a sawi.

MNF chu ramhnuaia a luh hmain, Assam state MLA thlan hnuhnung berah MLA seat 3 awmah seat 2 ah hnehtu an nih avangin MNF hian Zoram mipui ai an awh phak tih sawiin K Vanlavena chuan, “MNF leh India inremnaah MNF chu Mizoram mipuite aiawh ni phak lo anga Pu Duhan thu a sawi mai hi lo ngaihtuah chiang leh rawh se. Khatih laia Mizoram Chief Secretary Pu Lalkhama, IAS pawhin hming a sign ngei laia, Mizoram sorkar aiawha hming sign a nih loh thu a sawi lui talh te phei chu mipuite bum tumna liau liau a ni,” a ti.

ILP chungchang sawiin K Vanlalvena chuan, “Indian Consitution Article 19(5) behchhana tribal te humhim nana hman thin a ni a. Mizoram Accord-ah chu chu nemngheh leh a nih avangin a nghet tawk a ni. Kum 1994, July thlaah India Home Minister SB.Chavan an hmarchhak CM te Shillong ah ko khawmin, ILP hlih a rawt tum pawh khan nasa taka dodal a ni a. MZP ten Independence Day kan boycott a, August thlaah Special Assembly koin ILP hlih kan remtih loh thute Mizoram Sorkar chuan a passed a nih kha. Kum 2007-ah ILP hlih tumna awma hriat a nih leh avangin, MNF Sorkara Law Minister Pu H.Rammawi hoin, all party leh all NGO aiawh team chuan thawhpuia sawm turin Arunachal leh Nagaland-te kan va tlawh a ni. Neiphiu Rio Nagaland CM phei chuan, ‘An duh chuan hlip se la, lokal rawh se, an lu kan lo tansak ang, mi lu la hnam kan nih hi’ a tih hial laia kan CM Pu Duhan dawih aw a chhuah ta mai bik hi a zialo hle a ni,” a ti bawk.