News

Mizoram Hindi Prachar Sabha bultumin vawiin (14.9.2026) hian Dawrpui Multipurpose Hall-ah Hindi Diwas (Day) hman a ni a, Chief Minister Lalduhoma leh Education Minister Dr Vanlalthlanate’n an hmanpui.

Chief Minister chuan Sorkar Laipuiin Hindi a uar tial tial tih sawiin, “Hindi thiam lo tan chuan kan duh leh kan duh loh thilte kan sawi chhuak thei lo fo. Mi fel tak pawh kha a fel tih a hriat theih loh thin. Chuvang chuan, Hindi hi kan thangtharten rawn thlahthlam lo vang che u,” a ti.

Lok Sabha MP a nih laia Mizorama Hindi zirnain hma a sawn theihna tura hma a lak tawhnate a tarlangin Lalduhoma chuan, “MP a nih laia ka hmalakna zarah khan kum 1988-ah Mizoramah Hindi pawl sawm (matric) leh PU (intermediate) Exam phalna (recognition) central sorkar chuan a rawn pe,” tiin a hnu lawkah kum 2000 khan BA exam phalna a rawn pek thu a sawi.

Hindi thiam chu a tha a ni satliah lo, a tulin a tul tawh zawk tih sawiin, “Amaherawh chu, Hindi kan thiam vang emaw thiam kan duh vang emawa an hnamzia entawn kher kha a tul lem lo. Mizo takin Hindi tawng thiam ila, an hla i sa ang u. Chutianga kan tih loh chuan kan hnamzia kan hloh tial tial ang a, kan sakhua thlengin min hliau thei a ni,” a ti.

Education Minister pawhin thu sawiin, “Education Reforms Committee chuan Hindi Speaking Day hman tha a ti a, thla khatah ni khat talin bul tan kan rel. Hindi thiam hi hnam dangte nena kan inpawhna leh kan eizawnna atana thil tul a ni, a ti. Hindi subject-a Ph. D nei 20 chuang kan nei tawh,” tiin kan neih belh zel pawh a rinthu a sawi.