News

Vawiin (14.8.2026) hian Chief Minister Lalduhoma chuan Lengpui Vengtharah Dr. Lalrokhawmate chhungkaw din Samuel Lifecare & Cosmetics Private Limited Company a hawng. He company hian kum thum chhung zirbingna (Research & Development) a kalpui hnuah tunah hian cosmetic chi hrang hrang 46, home care products chi 9 leh food supplement chi 2 an siam chhuakin an hralh chhuak tan tawh a ni.

A hawnna inkhawmah thu sawiin Chief Minister chuan, Samuel Lifecare & Cosmetics Private Limited kan hawng hi Mizoram tan mai ni loin, India hmarchhak tan hun chhinchhiahtlak a tlinga a hriat thu sawiin, “An products zawng zawng hi anmahni zirbingna atanga formula an hmuhchhuah behchhan veka an siam a ni. Cosmetics lamah phei chuan India hmarchhaka a hmasaber leh a awm chhun a nih hmel. Mizoram leh India hmarchhak tan mellung thar an phun tihna a ni,” a ti.

Mizoramah hian kumtin consumer goods lamah cheng tam tak kan hmang ral thin tih sawiin Lalduhoma chuan, “Cosmetics-ah ringawt pawh hian kan seng tam ngawt ang. Chung zawng zawng chu state pawn leh ram pawn atanga kan lakluh an ni. Kan pawisa thawhchhuah vete hi kan ramah rei tak cham loin state pawnah an chhuak zung zung thin. Kan ram ngeia kan mamawh thilte siam ve theih hi kan economy chawikan nana tihmakmawh a ni,” tiin kan ram siamchhuah hi state dangah zuar ve sup sup tawh zawk se tih chu an duhthusam a nih thu a sawi.

CM Lalduhoma chuan an sorkar phat atang khan hetiang lama hmasawn dan hi kan ngaihven nghal tih sawiin, “Kan Flagship Scheme – Handholding pawh hian a tum ber chu – chutiang ti thei emaw ti thiamte Bana Kaih hi a ni. Thil thar ngaihtuah chhuak thiamte tanpuitu tur Innovation Centre leh Incubation Centre kan nei. An thil hmuhchhuah a taka chantir tura hma an laknaah anmahni thawhpuina tur Bana Kaih Venture Capital Fund kan la nei leh zel a, kan entrepreneur-te tan hian kan inhawng em em a ni,” a ti.

Company neitu Dr. Lalrokhawma skum thum kalta atang tawha bul an lo tan tawh a ni. An thil siam chhuahte chu uluk taka a formula an chawhchhuah, quality tha tak tura an kalpui a nih thu sawiin, “A formula ber kan neih tawh avangin lian thama kalpui thei kan ni tawh a, mipuiten min hmansak duh phawt chuan Mizoram mamawh zawng zawng hi thla ruk chhungin kan siam vek theiin kan ring,” aan product-te hi an quality a tha tawk tih hi huai takin an sawi ngam thu a sawi.