CM-in Serchhip MJA jubilee a hmanpui

Vawiin (13.10.2025) hian Serchhip District MJA te chuan an pawl dincham kum 25 (Silver Jubilee) an lawm a, Bialtu MLA Lalduhoma, Chief Minister-in a hmanpui.

Chief Minister chuan MJA-te chu sorkarin a hmalaknate mipuite hnena hrilhhriatna hmanruaa a hmang ang bawkin, mimal, pawl leh kohhran leh political party pawhin an thu leh hla puan chhuah nan an hmang tih sawiin, ‘Mipui aw a nih rualin mipui beng leh mit a ni nghal. Mi zawng zawngin kan hmang tangkai vek mai a ni. Chutiang taka ram inrelbawlnaa hmanraw pawimawh a nih thin avang chuan journalist-ten khawtlangah dinhmun sang tak in luah a, sorkar pawhin a dah sang thin. Anmahni enkawltu tur deparment dinin, an tana hamthatna awm thei chite a siam. Accreditation a pe a, Advertisement rate a siamsak a, Press Tour te a buatsaihsak a, thihna an tawhin ralna tha tawk tak a pe a, tun hnaiah pension scheme a siamsak ta zel a ni,’ a ti.

Accredited journalist te hi chu dawt leh thu belhchian dawl lo thehdarh turah an ngai ngai lo tih sawiin Chief Minister chuan, ‘In sawi hi chu kan ring mai thin. Tunah phei chuan social media a chakin a rang si a, mitinin a thehdarhna hmanrua kan hum fur mai. Thu leh hla a darh chum chum a, thu dik leh dik lo hriat hran a har thin hle. Mite ngaihtuahna hruai sual thei thu thehdarh pawh a tam tial tial,’ tiin politics lama kan inbeihna tawngkam leh comment tam takte phei chu chhiar hrehawm khawpa mawi lo a tam sawt thu a sawi.
Lalduhoma chuan social media lama thu belhchian dawl vak lo thehdarh chingte, tawngkam bawlhhlawh tak tak hmanga midang umzui chingte hi mi rawntlak leh chinchang hria an vang viau tih sawiin, ‘Tam tak phei chu mahni hming dik leh hmel tak pawh lantir ngam lo, tlanchhe chunga midang beih ching, mi dawihzep an ni. Social media lamah chutiang chu a tam avangin mipuiten thu dik hrilhtu leh kaihruaitu tha an mamawh. Nangni, kan MJA member leh accredited journalist-te hi chutianga thu dik puangdarhtu, mipuite tana rinawm taka rawngbawltu ni tura ngaih in ni,’ a ti.

Mumal taka kal Serchhipa chanchinbu hmasa ber chu Lenkawl niin kum 1981 khan Remmawia Kawlniin a din a, um 1993-ah Ramlai Arsi a lo chhuak ve leh a, kum 2000 chhovah an lo pung ta a ni. Serchhip District Journalist Association an din a, kum 2006-a Mizoram pum huapa MJA an lo inchhunfin khan anni pawh an inchhunglut ta a ni. Tunah hian Serchhip district MJA member hi 14 an ni.