CM-in Women Hostel sak tur lungphum a phum

Vawiin (17.10.2025) chawhma khan Chief Minister Lalduhoma chuan I & PR Auditorium-ah Khatla Venga Working Women Hostel sakna tur lungphum a phum a, Bialtu MLA VL Zaithanzama’n a tawiawm. Khatla-a hostel hi kumina Working Women Hostel sak thar tur pasarih zinga pakhat a ni.

Chief Minister chuan 15th Finance Commission hun tawp lamah kan awm avangin an fund hmuhte hi hmanhmawh taka kalpui a tul tih sawiin, ‘Chuvang chuan SASCI hna thenkhat hi chu restricted tender kalpui kan phalsak a ni. SASCI 2024-25 Part X- ah Central Sorkar chuan Working Women Hostel sakna tur a ruahman a, Mizoramin cheng vbc. 127 kan hmu a, hostel pasarih sak kan pawm ta a ni,’ a ti.

Vawiina a lung an phum Khatla -a Working Women Hostel chu Mizo Hmeichhe Tangrualten kum tam tak women hostel an lo kalpui tawhna hmun a nih thu sawiin Lalduhoma chuan, ‘An building a upain a thar an mamawh tih kan hria a, mi tam zawk lenna neih a tul bawk,’ tiin a thar saksak an rel tak thu a sawi.

CM chuan hmasawnna hnathawhte hi a hun taka zawh zel theih an duh tih sawiin, ‘Hna thawh tha kan duh a, revise ngai lo va kal zel kan duh bawk. Chutianga kan kal theih nan chuan sorkar hmalakna viltu tur State Monitoring Committee kan din a ni. Anni hian kan women hostel sak mekte pawh hi a tul angin an rawn endik thin ang,’ a ti.

Vawiina a lungphum phum tak hi mi 140 awm theihna tur, cheng vbc. senga 29. 72 sak tur a ni.