News

Vawiin (8.8.2026) tlai dar 3 khan ZPM Media & Publicity Dept. Chairman B. Lalchhanzova, MoS chuan Chief Minister Lalduhoma chu Mizoram Legislative Assembly House Recess Room-ah tawlhlohpuan a bahtir.

ZPM Media Chairman chuan, “Parliament-a dan siam danglam tum mêk; FCRA chu Kristian mipuite tâna a ṭhat lohnate MKHC leh CCM te nena Union Home Minister an hmu leh an hmalâkna a ropui êm avangin tawlhlohpuan kan bahtir a ni,” a ti.

B. Lalchhanzova hian thusawiin, “Kan Chief Minister hi vawiinah a lo haw dawn avangin MNF unauten CM Bangla gate bulah pawndum nen an lo nghâk a, keini pawhin tawlhlohpuan hlan kan tumin kan ngaichâng a ni. Mah se, kar kalta lama a programme tihfel tawh avangin MLA Conference Hall lamah chawhnu dar 3.30 khan Social Welfare, Women & CDD huaihawtin Bana Kaih CM Special programme leh certificate leh GIA to Accredited Drugs Treatment certificate semnaah khuallian a lo ni a. Chuvangin kan pan chilh ta a ni,” tiin CM-in bangla a pan nghal loh chhan a sawifiah.

August ni 6-ah Chief Minister Lalduhoma, Council of Churches in Mizoram, (CCM) General Secretary Rev. Lalhmangaiha leh Mizoram Kohhran Hruaitute Committee (MKHC) Secretary Rev. Lallawmthanga te New Delhi kalin, Parliament House-ah Union Home Minister Amit Shah an hmuh thu sawiin, “FCRA Mizoram tân a him tawk lohna te thlenin ‘memorandum’ an thehlut a ni. Hemi avang hian Pu Amit Shah hian an thil thlena pawimawhtak ‘retrospective’ FCRA awm hma leh a bawra ‘registration’ te an tih tel loh thute sawiin, kar leha Parliament ṭhutkhawm neih hmain an thu thlen dangte a lo zirchiang dawn tih a sawi, kan lawm em em a ni,” tiin Kristian te hlauhthawn FCRA chungchanga Chief Minister te hmalakna chu fak a phu hle thu a sawi.

ZPM Media Chairman chuan FCRA chungchanga Chief Minister Lalduhoma leh ZPM Party hmalakna sawiin, “Kar hmasa lama Kawrthah North V/C programme-ah CM chuan ‘Kristian mipuite tâna him lovah chuan kan dodal zel dawn’ a ti. ZPM PAC Extended Committee chuan CM Bangla-ah August 5, 2025 khan FCRA chungchang kan ngaihtuah tawh. Kan duhdana thil kan tih chu kan MP pahnihten nghet takin kan vuan ang a, kan dinna a nih loh chuan FCRA hi Parliament House-ah kan ‘pass’ pui lo mai ang,” tiin ZPM Party dinna a sawi.