Congress kan sorkar a ngai &#8211; Lalnunmawia Chuaungo

MPCC hruaitute chuan vawiin (13.8.2026) hian Hrangturzo Bial chhunga khaw hrang hrang an tlawh a, MPCC Sr. Vice President Lalnunmawia Chuaungo chuan ZPM Sorkarin mipui hnena chhiah a lak, hma kan sawnpui loh thu sawiin, Congress an sorkar a ngaih thu a sawi.

MPCC Sr. Vice President chuan, “ZPM Sorkarin mipui hnenah chhiah chi hrang hrang la mahse, hma kan sawnpui lo hle. Kawngpui siamna atan mipuiah chhiah an khawn chung pawhin kan kawngpuiten a ṭhat phah chuang lo. Hmasawnna hna chi hrang hrang thawh hmuh tur kan la nei lo a, a pawi tak zet. Mizo mipuite tana hmasawnna nasa zawk thlen tir turin Congress kan sorkar a ngai a ni,” a ti.

Lalnunmawia Chuaungo chuan, electric bill a sang em em nia sawiin, “Chuti chung chuan eng kan hmuh ṭhat phah chuang lo a, a thim zing em em. Gujarat sorkar chuan power chungchangah ruahmanna ṭha tak an neih avangin kumtin vaibelchhe tam tak an thawk chhuak thei. Gujarat in power a sum a thawh chhuah chungchangah a thawktu ka ni ve,” tiin Mizoramah pawh ruahmanna ṭha kan neih phawt chuan power-ah sum tam tak kan thawk chhuah ve theih thu a sawi.