CYMA-in kawng dinhmun enfiah

Vawiin (8.11.2025) chhubn khan Central YMA CEC-in alo rel tawh angin, Mizoram châk lakluhna kawngpui Sairang to Vairengte kawngpui chu CYMA-in an president R Lalngheta hoin an enfiah a, OB pali leh CEC member 37 thawk chhuakin, PWD atangin SE, EE leh SDO te’n an tawiawm a, NHIDCL hotute leh an hnuaia contractor-te’n an lo dawngsawng.

R Lalngheta chuan, ‘Kan kawngpui thatna atan hian Sawrkar leh pawl hrang hrangten hma kan la. Amaherawhchu kan chak lakna ber kawngpui hi a tha mawh hle. Vawiinah YMA-ten Inkhawmpui Lianah kan rel angin Sairang- Kawnpui inkar kawngpui siamthat mek kan tlawh. An hmalaknate kan en ang a, tha taka kan hrilh hnuah pawh a ngai reng a la ni a nih chuan – ‘Kan rama hnathawk tur hian midang lo lut rawhse, nangni chuan min lo hawsan tawh rawh u’ kan tih hunte pawh a awm lovang tih a sawi theih loh,” a ti.

NHIDCL leh contractor-te hian hna an thawh mek leh an work plan-te sawiin, hmanraw lakluh leh thil danga harsatna an tawhte CYMA hruaitute hi an lo hrilh. Central YMA hruaitute chuan harsatna an neihte pawh inhthlahrung loa an hnena thlen zel tur leh kawng siam mekah tha taka an thawhpui tur thu an hriattir.

CYMA hruaitute hian Sairang leh Kawnpui inkar kawng chhia siamtha tur contractor-te chu an hnathawh hun chhunga tha tak leh lungawithlak taka thawh zo hman ngei turin an chah a, ‘In hnathawh dan kan enzui zel ang,’ an ti.

CYMA hian monitoring atan thil sawiho zung zung awlsam nan leh hnathawh dan tarlanna turin NHIDCL, contractor leh CYMA hruaituten ruahmanna siam an tum.

Central YMA hian kawng chungchanga an hmuh dan hi executive meeting-ah an sawi zui dawn a, Mizoram Sawrkara thlen tur leh NHIDCL leh contractor te la sawi pui zui tur te an sawiho leh dawn a ni.

Central YMA Team hi Awithangpa Group YMA hruaitute leh Sub-Hqrs. YMA Kolasib hruaituten lo dawngsawngin Sub-Hqrs. YMA Office- ahleh Kolasiba NHIDCL office-ah kawng chungchang sawihona hun an hmang nghal. He hunah hian Youth for Kolasib (YFK) te hmalak tawhna report ngaihthlak a ni.

Central YMA hruaitute hian kawng dinhmun enfiah hian Vairengte an thleng a, Vairengte Joint YMA Committee Room ah sawihona hun an hmang leh a ni. Vairengte- Sairang four lane laih tan meka contractor-te pawh sawipuiin, a nih dan tur anga hnathawk turin an chah a, an la en zui tur thu an hrilh.