Nov 08, 2025
Saturday
MPCC hruaitute chuan vawiin (8.11.2025) hian Aizawl Press Club-ah press conference neiin, Dampa Bialah sum lengvak a nasat thu leh MNF leh ZPM Sorkarah mipui an rum nasat thu an sawi.
MPCC Treasurer Dr Lalmalsawma Nghaka chuan kan sorkar hrawn lai mek an intiamnaah an ding nghet lo em em nia sawiin, ‘Zoram mipui kan rum mek a ni. Hmanni lawka kan hrawn MNF Sorkarah pawh khan mipui kan rum a, kan retheih phah zual nasa hle a ni. Chumi chu hrerengin leh kum 2028 rilru a nei telin kan ramah mahni intiamnaa dingnghet thin ‘ka ti ang ti’ sorkar a lo pian theih nan leh dawt ringawt leh thudik chanve hmanga mipui vehthlema kan awm tawh loh nan kan ramah dikna a lal theih nan tun by-election hmang hian Dampa Bial mipuiten hma hruai leh turin ka ngen che u,’ a ti.
Dampa Bialah an la hriat ngai loh sum lengvak a nasa em em tih sawiin Dr Lalmalsawma chuan, ‘Ngaihtuah chian chuan mipuite dikna chanvo chhuhsakna, mipuite lei tumna a thleng mek, hei hi Mizoram kal zel turah a bik takin kan tuchhuan te lo awm turah a tha lo em em a ni,’ tiin heng lakah hian Dampa Bial mipuite lo invenghim turin a sawm.
MPCC Treasurer chuan ndia ram pum ang pawha Modi-a kaihhruai sorkar Mizoramah pawh do thei tur, a nawr thei tur awm chhun chu Congress Party an nih thu sawiin, ‘Congress hi engtikah mah Pu Modi leh a sorkar agenda-ah hian kan tlulut ve dawn lo. Vawiinah hian FCAA chungchangah ringawt pawh kan sorkar hrawn lai mek ZPM Sorkar hian central a Pu Modi a sorkar a hlauh avangin an hnungtawlh der a ni. MNF Party lah ni se, NDA hnuaiah NEDA ah nghet takin an la awm a, vawiin ni thlengin an thawhhona an la chhuchat duh lo a ni,’ tiin mi harsa ber rahbi tleu tawhte chawikan an nih leh theih nan an candidate John Rotluangliana vote turin mipuite a ngen.
