Nov 19, 2025
Wednesday
Vawiin (19.11.2025) hian Dampa Bialtu MLA Dr. R Lalthangliana chuan Pathian leh Dampa Bial mipui hnenah lawmthu sawiin, Tuahzawl, West.Phaileng, Kawnmawi, Chhippui leh Lallente a fang.Tuahzawl-ah hian by-election inthlan result puan hnua ZPM VCP hoa MNF-a a lawmluh tak VC member-te nen tukthuan an kilho nghal.
Dampa bial MLA atana thlan thar Dr. R Lalthangliana chuan campaign chhungin an hriat loh laiin, mi rilru an tihnatte a awm anih chuan ngaihdam a dil a, “Unit, block leh campaign committee-te pawh in duhthusama kan ngaihsak hman tawk lohnaah ngaihdam ka dil bawk che u a ni. MNF campaigner leh party dang campaigner zawng zawngte pawhin accident harsatna leh buaina lian tham an tawk lo nia ka hriat avangin Pathian hnenah lawmthu ka sawi a ni. Thahnemngai taka vote thlaktu Dampa Bial mipui chungah ka lawm hle,” tiin vote a tlak that avangin bial mipui a fak.
Dr. Thangtea chuan, “Tuna kan chakna chhan hi keima leh kan party chakna vang ni loin Pathian malsawmna vang chauha hnehna chang kan ni a, chhete maha chapo thei kan ni lo a, rilru thianghlim leh rilru hrisel hi mi tinin i pu theuh zawk ang u. Min thlangtu chauh ni lo, khawvel hmun hrang hrang atanga min tawngtai puitu zawng zawngte chungah ka lawm em em a. MPF leh sorkar official lama thawktute hnenah ka lawm hle a. Lo vanduai ta party dang candidate leh worker zawng zawngte ka tawrhpui a, an kal zelna turah duhsakna sang tak ka hlan nghal,” a ti.
