Dr. Thangtea kan lawmpui hle &#8211; ZPM

ZPM chuan thuchhuah siamin, Dampa Bial MLA by-election neih zawh taka thlan tlin Dr. R. Lalthangliana an lawmpui thu tarlangin, ‘MLA tha tak ni tur leh Dampa Bial hmasawnna tura theih tawp chhuaha thawk turin duhsakna kan hlan,’ an ti.

Hnehna chang zo ta lo mah se, kum 2023 inthlanpui ai khan hma an sawn vanga an lawmthu tarlangin, ‘Kan official candidate Pu Vanlalsailova lo vote-tu zawng zawngte leh party tana theih tawp chhuahtu, ZPM General Headquarters atanga campaign-a feh chhuak te, Dampa Biala ZPM block leh unit zawng zawngte chungah lawmthu kan sawi tak meuh meuh a ni,’ tiin an official candidate Vanlalsailova bakah party dang candidate, tling zo ve ta lo te an tawrhpui tak zet tih an tarlang.

ZPM chuan party tinten inthlanah chak ngei tumin theihtawp an chhuah tlang theuh tih tarlangin, ‘Campaign laia ZPM campaigner-te mi rilru tina zawng emaw, harsatna thlen emaw an awm a nih chuan ngaihdam kan dil a ni. Mizoram siam thatna leh hmasawn zelna tur ngaihtuah tlang a, party tinte theih tawp chhuah thar theuh turin kan insawm a ni,’ a ti.