Education Dept. quarterly review meeting

Vawiin (18.11.2025) hian Planning & Programme Implementation Conference Hall-ah Education Department Quarterly Review Meeting vawi 6-na neih a ni a, School Education Minister Dr Vanlalthlana chuan a kaihhruai.

Review meeting-ah hian Education Consultant bakah Education Department hnuaia office hrang hrang, Secretariat, Directorate, MBSE, SCERT, Samagra Shiksha, Mizoram Language Development Board (MLDB), DIET leh district official-te an tel.

He hunah hian zirna in tlawh chhuaha en dik dan tur chungchang te, zirna hmanga zirlai naupangte ruihhlo leh zuk leh hmuam laka fihlim tura inkaihhruai dan tur chungchang te, zirtirtu hna dil tana syllabus hman tur bik duan chungchang te, district inrelbawlnaa Sub-Divisional Education Officer-te Samagra Shiksha Office-a mawhphurhna pek chungchang te, HSLC leh HSSLC result siam dan phung ṭha zawk tur te, Samagra kal phung thar tur Samagra 3.0 chungchang leh academic document lem zawn chhuah chhunzawm dan tur chungchangte sawiho a ni.

Meeting-ah hian academic document lem hmanga sawrkar hna dil leh thawk tawh zingah academic document lem hmang ṭhenkhat hmuh chhuah an nih ṭhin thu leh hrem leh ban an nih dan te tar lan a ni a, Education Department hnena document rinhlelhawm thlentu an tam avangin chak leh zuala hma lak a ṭul thu sawilan a ni. Document lem zawn chhuah chhunzawm an rel.