Eitur expired tawh an man

Serchhip District Consumer Protection Council thurel bawhzuiin nimin (19.11.2025) khan Serchhipa dawr hrang hrangah expired tawh bungrua leh eitur zawrh tam tham tak man a ni.

Lenkawl Editor Zonuna Kawlni hnen atanga thudawn danin, ni 13.11.225 a Serchhip District Consumer Protection Council thutkhawmah Serchhip District chhunga dawr hrang hrangah expired tawh eitur lo zuar ru an awm thu leh hralh chhuak thin an awm tih report tam tak a awm avangin Health Department hnuaia Food & Drugs Administration te, Police, Consumer Union leh Legal Metrology ten hma lo la se, an ti a ni.

Thurel bawhzuina atan hian nimin khan Serchhipa dawr hrang hrangte chu a thawhkhatna atan enfiah niin, eitur chi hrang hrang, a siamtuten a expired hun tur an siam pel tawh chunga la zawrh tam tham tak an man. Hengte hi hralh theih tawh loh tura chhinchhiah niin, dan angin a tul anga hmalak zui tur a ni ang.