Excise-in CYMA hnenah motor an hlan

Vawiin (1.6.2026) hian Excise & Narcotics Department chuan Central YMA hnenah ruihhlo dona atana hman tur lirthei an hlan.

Lirthei inhlan puala inkhawm buatsaihah Excise & Narcotics Minister Lalnghinglova Hmar chuan thu sawiin, “Vawiin hi ni chhinchhiah tlak a ni. Mizorama ruihhlo dona kawnga pawl thawhhlawk tak, YMA-in ruihhlo an dona atana lirthei an dawng hi a lawmawm hle. Ruihhlo do kawngah hian PPP (Public-Private Partnership) ang takin kan kal a ni ber mai. Narcotics Control Bureau-te pawhin YMA hmalakna an hria. Mizorama office neih an duh. Tun hma aia kan thawhhona tha neih a tul lehzual. Mahni hun laia theih tawp chhuah hi hriat reng an ni thin,” tiin a sawi.

CYMA President R. Lalngheta chuan ruihhlo dona kawnga harsatna tam tak an tawh kara lirthei thar an dawng leh chu lawmawm a tih thu a sawi a, “Excise Department leh YMA thawhhona hi a chhe ngai lo a, zanlai pawh sawi loin a tul hunah an che chhuak zel thin hi a lawmawm hle. Minister, ruihhlo dova a phur hian YMA-te min ti phur em em a, Excise Commissioner leh OC te pawh fakawm kan ti,” a ti.

Thawhhona tha zawk neih chhoh zel an beisei tih sawiin Lalngheta chuan, “Keini lam hauh kan tul pawhin min hau hreh lo ula, mit tikham kan awm chuan min hrilh hreh lo ula, a tul angin kan inthunun/chawlhtir zel ngam. Nasa leh zual zawka thawkho zel turin kan insawm,” tiin thawhpui zel atan a sawm.

Heng motor-te hi March 15.2.025 a Union Home Minister-in Aizawl a lo zin tum a, Central YMA ten ruihhlo dona tur motor an lo dil kha a ni. Vawiina inhlan tak motor 6 bakah hian Mahindra Bolero Camper 3 a la thleng lova,a thlen hunah Central YMA hnenah hlan leh a ni ang.

Vawiina Central YMA hnena Motor hlan te hi Ecco Van 3 leh Mahindra Bolero Camper 3 an ni.